Татарстанда җылы бирү сезонын башлау турында карар барлык 45 муниципаль берәмлектә кабул ителде

Татарстанда социаль-мәдәни объектларга җылы бирү сезонына әзерлеге 100%ка җиткән. Бу хакта бүген Татарстан Республикасы Хөкүмәте Йортында узган киңәшмәдә ТР төзелеш, архитектура һәм торак-коммуналь хуҗалык министры Марат Айзатуллин хәбәр итте.

Киңәшмәне видеоконференцэлемтә режимында Татарстан Премьер-министры Алексей Песошин уздырды.

Марат Айзатуллин алдагы җылы бирү чорына әзерлек турында сөйләгәндә хәбәр иткәнчә: тапшырылган мәгълүматларның дөреслеген раслау өчен Министрлык тарафыннан социаль объектларның әзерлек актларын соратып алу һәм анализлау юлы белән әзерлекнең факттагы торышын өстәмә тикшерү башланган.

Татарстан Республикасы Төзелеш министрлыгы башлыгы бүгенге көнгә 13 муниципалитетның актлар бирмәвен искәртте. Әзерлек актлары әзерлек чараларының тәмамлануын раслый, әмма әзерлекнең сыйфатын соңгы бәяләүне җылы бирү чоры күрсәтәчәк, диде ул.

Торак фонды буенча төбәк буенча уртача әзерлек паспортлары күрсәткече 99% дип бәяләнә. Шул ук вакытта 6 муниципалитет паспорт бирү эшен төгәлләмәгән. Болар: Аксубай, Бөгелмә, Югары Ослан, Кама Тамагы, Чистай районнары һәм Казан шәһәре. Димәк, Татарстанның 39 районы үз йөкләмәләрен үтәгән инде. Җылылык җибәрүгә килгәндә, җылы бирү сезонын башлау турында карар барлык 45 муниципаль берәмлектә дә кабул ителгән, дип хәбәр итте Марат Айзатуллин.

Республикада барлык объектларга һәм торак йортларга җылы бирү буенча актив эш алып барыла. Бүгенгә 14 096 объектта җылы җибәрелгән, бу 49% тәшкил итә. Муниципаль берәмлекләр башлыкларына һәм ресурслар белән тәэмин итүче оешмалар җитәкчеләренә җылы бирү сезонына әзерлек һәм аны башлау мәсьәләләрен шәхси контрольдә тотарга кирәк, дип ассызыклады ул.

Татарстан Премьер-министры Алексей Песошин җылылык җибәрүгә һәм җылы бирү сезоны башлануга кагылышлы барлык мәсьәләләрне дә катгый контрольдә тотарга кушты.