Татарстан халкы илдә беренчеләрдән булып КФҮнә MAX аша языла ала
Татарстан Республикасында Дәүләт һәм муниципаль хезмәтләр күрсәтүнең күп функцияле үзәге директоры Ленара Мозаффарова республика халкына КФҮ офисларына алдан язылу өчен MAX мессенджерындагы чат-боттан файдаланырга киңәш итте. Бу хакта ул ТР Хөкүмәте Йортында узган брифингта сөйләде.
Брифингның темасы - "Татарстанның КФҮдә чит ил гражданнарына комплекслы хезмәт күрсәтү һәм мошенникларга каршы көрәш буенча законнар чыгару механизмнарын гамәлгә кертү буенча яңалыклар турында".
Ленара Мозаффарова хәбәр иткәнчә, MAX чат-ботының интерфейсы аңлаешлы һәм сорауларны эшкәртү тизлеге яхшы. Бот шулай ук документларның әзерлеге турында кирәкле мәгълүмат та бирә. "Сервистан туп-туры смартфоннан файдаланырга мөмкин", - диде Ленара Мозаффарова брифингта.
Искәртәбез, быел җәй көне Россия Хөкүмәте мондый коралны эшләргә һәм гамәлгә кертергә кушты. Нәтиҗәдә, Татарстанның күп функцияле үзәге илнең беренче 20 күп функцияле үзәге арасында MAX да чат-бот булдырды.
Татарстан КФҮ чат-боты КФҮ бүлекләренә кабул итүгә язылырга, язылуны гамәлдән чыгарырга, мөрәҗәгатьнең статусын, үзәкләрнең эш графигын һәм аларның адресларын белергә мөмкинлек бирә.
Ленара Мозаффарова татарстанлыларны игътибарлы булырга өндәде: мошенниклар telegramда охшаш чат-бот булдырган инде. Мөгаен, мондый ялган бердәнбер түгелдер, дип саный ул.
"Татарстан КФҮнең telegramында чат-бот юк. Кабул итүгә язылу чат-ботлар ярдәмендә «ВКонтакте» социаль челтәрендә һәм MAX мессенджерында гына башкарыла», – дип аңлатты Татарстан Республикасында КФҮ директоры.
ММЧ вәкилләре сорауларына җавап биреп, Мозаффарова: "Моны даими рәвештә анонслаячакбыз, гариза бирүчеләр белән сөйләшәчәкбез. Бездә хезмәткәрнең һәр эш урынында QR-кодлар бар, мөрәҗәгать итүчеләргә алар теркәлсен һәм әзер документ турында хәбәрнамәне MAX аша алсын өчен фотога төшерергә тәкъдим итәбез».
КФҮ директоры Татарстанда кредит алудан үз-үзеңне тыю гамәлен 21,4 мең кеше рәсмиләштергән, 5,2 меңгә якын граждан гаризасын кире алган, дип сөйләде.
«Үз-үзеңне тыю куйган очраклардан соң бер көн узуга килеп: "Юк, шулай да кредит аласым килә, ә банклар баш тарта", - диләр. Система эшләвен яки эшләмәвен тикшергән очраклар да булды", - диде ул. Шулай ук тыю яки аны кире алу турында белешмәләр сораткан 500 очрак теркәлгән.
Кулларында РФ гражданы паспорты, ИНН турында белешмәләр һәм шәхси мәгълүматларны эшкәртүгә ризалык биреп, тыюны билгеләү өчен дә, аны кире алу өчен дә мөрәҗәгать итәргә мөмкин.
2025 елның мартыннан россиялеләр Дәүләт хезмәтләре порталы аша кредит алудан үз-үзен тыюны рәсмиләштерергә һәм кире алырга мөмкин, ә августтан - КФҮ офислары аша. Гаризаны шәхсән генә бирергә мөмкин, ышанычнамә буенча хезмәт күрсәтелми.
Үз-үзеңне тыю куллану кредитларына һәм заемнарга гына кагыла, әмма ипотека, автокредитлар һәм дәүләт ярдәме белән белем бирү кредитларына кагылмый. Ул тулы яки өлешчә булырга мөмкин.
Үз-үзеңне тыюны теләсә кайсы вакытта билгеләргә мөмкин, хәтта кешенең кредитлары булса да. Ягъни гамәлдәге кредитлар калачак, яңаларын алырга ярамаячак.
Үз-үзеңне тыю куелган икән, граждан үзе аны гамәлдән чыгарганчы, вакыты чикләнми.
Брифинг барышында Ленара Мозаффарова 2025 елда чит ил гражданнарына карата законнардагы үзгәрешләр, шулай ук республиканың күп функцияле үзәкләренә чит ил гражданнарын кабул итүнең ничек оештырылуы турында сөйләде.