ТР Хөкүмәте Йортында узган брифингта 8 апрельдән 10 апрельгә кадәр Казанда узачак Россия венчур форумы турында сөйләделәр
Россия венчур форумын оештыручылар катнашучыларның стартапларына 1 млрд сум инвестицияләр кертү турында килешүләр көтә. Бу хакта бүген ТР Хөкүмәте Йортында узган брифингта ТР Инвестиция-венчур фонды директоры Дамир Галиев сөйләде.
Брифинг 2026 елның 8-10 апрелендә Казанда 20 нче Россия венчур форумын уздыру мәсьәләләренә багышлана. Форум чаралары Казанда һәм Иннополиста узачак. Анда стартаперлар, венчур фондлары вәкилләре, инвесторлар һәм дәүләт хакимияте органнары вәкилләре катнашачак.
«Soft commitment» термины бар, тәрҗемәдә ул шундый "йомшак йөкләмә" дигәнне аңлата. Узган ел форум нәтиҗәләре буенча мондый йөкләмәләр барлык публикацияләрдән, сессияләрдән, сайлап алулардан соң 900 млн сумга җыелган иде. Кагыйдә буларак, алар төрле конверсия белән башкарыла. Бәлки өчтән бере, бәлки яртысы ел дәвамында үлчәнә. Быел 1 млрд сумнан артык акча җыярга уйлыйбыз", - дип аңлатты Дамир Галиев.
Эшлекле программасы 9 һәм 10 апрельдә Казанда узачак Россия венчур форумына БДБ илләреннән, Азиядән һәм Якын Көнчыгыштан, Африкадан катнашучылар киләчәк. Алар арасында инвесторлар һәм стартаперлар бар, дип хәбәр итте брифингта Дамир Галиев.
"Күргәзмәдә химиягә бәйле [чит ил] проектлары, сәнәгать технологияләренә IT кертүгә бәйле проектлар булачак. Бер Африка мәгариф проекты бар, ул Россия мәгариф программаларын үз платформасына кертә һәм Африка континентында Россия мәгариф программаларының үзенә күрә дистрибьюторы булачак", - дип сөйләде ул.
Презентация материалларында әйтелгәнчә, форумга Беларусь, Үзбәкстан, Казахстан, Һиндстан, Эфиопия, Габон, Камерун һәм башка илләрдән катнашучылар киләчәк. Израиль, Бангладеш, Согуд Гарәбстаныннан инвесторлар көтелә.
"Әгәр Ислам дөньясы илләре турында сөйләсәк, агымдагы геосәяси вәзгыять элементар рәвештә логистиканы катлауландырды. Һәм килергә планлаштырган кайбер проектлар, кызганычка каршы, килмәячәк", - дип өстәде Дамир Галиев. Ул шулай ук бу илләр вәкилләре белән багланышлар дәвам итәчәк, дип ышандырды.
ТР Фәннәр академиясе президенты Рифкать Миңнеханов брифинг барышында Татарстан предприятиеләре һәм оешмалары җитәкчеләренә Россия венчур форумы (РВФ) күргәзмәсендә катнашучы стартаплар белән танышырга киңәш итте.
Россия венчур форумы кысаларында стартаплар күргәзмәсе 9 һәм 10 апрельдә «Казан Экспо» ХКҮдә эшләячәк. Анда ясалма акыл, агротехнологияләр, медицина, мәгариф, робот техникасы, сәнәгать, энергетика, финанс, химия, электрон сәүдә юнәлешләре буенча 150 стартап катнашачак.