Татарстан Премьер-министры Илдар Халиков 22160 проектының баш патруль корабленә нигез салу тантанасында катнашты

Яшел Үзәннең Горький исемендәге заводында (предприятие “Ак Барс” холдинг компаниясе”ААҖ компанияләре төркеменә керә) 22160 проектының баш патруль корабленә нигез салу тантанасы узды.
Бу чарада ТР Премьер-министры Илдар Халиков, Россиянең Хәрби-диңгез флоты баш командующие Виктор Чирков, РФ Оборона министрлыгы, Татарстан министрлыклары һәм ведомстволары, Яшел Үзән муниципаль районы хакимияте һәм “Ак Барс” холдинг компаниясе” ААҖ вәкилләре катнашты.

Заманча патруль корабле территориаль сулыкларны саклау, ачык һәм ябык диңгезләрдә икътисади зоналарда патрульлек итү, пират һәм контрабанда эшчәнлеген ачыклау һәм диңгез һәлакәтләрендә зыян күрүчеләрне эзләү һәм ярдәм итү өчен, әйләнә-тирә мохитнең экологик мониторингын ясау, болардан тыш, корабльләрне, шулай ук хәрби-диңгез базаларын саклау өчен билгеләнгән.

Суднода 80 кешедән торган экипаж уңайлы шартларда урнаша ала. Корабльгә 12 тонналы эзләү-коткару вертолеты да сыя. Корабльнең сугышчан җиһазларына артиллерия, зенит-ракета һәм диверсиягә каршы кораллар керә. Моннан тыш корабль радиотехник һәм гидроакустик кораллар, шулай ук радиоэлектрон каршы тору чаралары белән җиһазланган.

Илдар Халиков завод эшчеләренә- хезмәтләре өчен, ә Хәрби-диңгез флоты җитәкчеләренә- заводка һәм аның продукциясенә игътибар өчен рәхмәт белдерде. Оборона министрлыгы һәм Россиянең Хәрби-диңгез флоты заказлары нәтиҗәсендә заводның эше һәм киләчәге бар, диде ул.

Виктор Чирков шулай ук, дәүләт программасын гамәлгә ашыру кысаларында заводның дәүләт заказы бар, программаның күләме зур, сезгә эш җитәрлек, дип белдерде.

Тантана барышында завод алдынгылары “ТРның атказанган машина төзүчесе” дигән мактаулы исем, ТР Премьер-министрының Рәхмәт хаты, шулай ук Россия Хәрби-диңгез флоты башкомандующие грамоталары белән бүләкләнде.