Мәскәүдә Татарстан Республикасының инвестицион проектларын финанслауда катнашу мәсьәләләре турында фикер алыштылар

2009 елның 12 нче февралендә Татарстан Республикасының Россия Федерациясендәге Вәкаләтле вәкиллегендә Татарстан Республикасы Премьер-министрының беренче урынбасары Борис Павлов предприятие җитәкчеләре белән Татарстан Республикасының инвестицион проектларын һәм программаларын финанслауда катнашу мәсьәләләре буенча берничә очрашу үткәрде.
“Инновацион технологияләр” корпорациясенең генераль директоры Борис Чирков һәм фәнни җитәкчесе Александр Лесуновский белән очрашуда наноиндустрия өлкәсендә һәм файдалы казылмалар эзләү максатыннан космик дистанцион тикшеренүләр үткәрүдә хезмәттәшлек итү; ягулык яну процессын оптимальләштерү өчен, автоном җайланмаларның сәнәгый производствосын булдыру; икенче тапкыр куллану максатыннан мазутларны һәм нефть шламнарын суландыру; юллар төзү; сәнәгый техник җиһазлау мәсьәләләре каралды.
Очрашу тәмамлангач, килешүне тормышка ашыру максатыннан, вакытлы хезмәт коллективы төзү турындагы беркетмәгә кул куелды. Анда корпорация хезмәткәрләре һәм “Федераль максатчан һәм региональ программалар дирекциясе” учреждениесенең икътисад тармакларындагы проектларны үткәрү өчен билгеләнгән вәкилләре керәчәк.
“Мәскәү автомат линияләр һәм махсус станоклар заводы” ААҖ генераль директорының беренче урынбасары Владимир Овецкий һәм коммерция директоры Александр Помырляну белән очрашу барышында илдәге иң зур күп профильле станоклар ясау предприятиесен “Алабуга” махсус икътисади зонасында урнаштыру мәсьәләсе каралды. Сөйләшүләр нәтиҗәсендә, бизнес-план әзерләп, аны Татарстан Республикасы Хөкүмәтенә кертү турында килештеләр.
Мәскәүнең завод урнашкан районын төзекләндерүгә бәйле рәвештә, аны икенче сәнәгый мәйданчыкка, мәсәлән, “Алабуга” махсус икътисади зонасы территориясенә күчерү мәсьәләсе килеп чыга.
Юл хуҗалыгында эш бирүчеләрнең “АСПОР” Гомумроссия тармак берләшмәсе президенты Александр Малов һәм вице-президент Сергей Веревкин белән очрашуның сәбәбе – бизнес вәкилләренең Татарстан территориясендә төзелеш алып бару өлкәсендә Татарстан Республикасы белән хезмәттәшлек итәргә теләк белдерүе. Татарстан Республикасының проект һәм программаларын финанслау ихтыяҗларыннан чыгып, законнар чыгару өлкәсендә үзара ярдәм итешү турында килештеләр. Шулай ук Александр Малов Татарстан Республикасы Хөкүмәтенә юл төзелешен финанслауның ышанычлы чыганагы булган территориаль юл фондларын торгызу өчен көрәштә ярдәм күрсәтүен сорап мөрәҗәгать итте.