Гомуми йорт ихтыяҗлары өчен кулланылган электр энергиясенә түләү белән бәйле проблемалар Татарстанда 1 нче марттан хәл ителәчәк

Бүген Татарстан Республикасы Министрлар Кабинетында узган брифингта Тарифлар буенча Татарстан Республикасы Комитеты рәисе Марина Фәйрушина һәм Татарстан Республикасының төзелеш, архитектура һәм торак-коммуналь хуҗалык министры урынбасары Раузил Хаҗиев 1 нче марттан Татарстанда электр энергиясе өчен түләүнең яңа тәртибе барлыкка киләчәге турында сөйләделәр.
Раузил Хаҗиев Татарстан Республикасы Төзелеш, архитектура һәм торак-коммуналь хуҗалык министрлыгына гомуми йорт ихтыяҗлары өчен кулланылган электр энергиясенә түләү белән бәйле проблемалар буенча бик күп сорау килүен әйтте. Әгәр 10 ел элек фатирларның 5-7 проценты гына счетчикларсыз булса, хәзер 900 фатирның 360 ында (якынча 40 процент) счетчик юк. Счетчиклар булмау, нормативлар буенча түләү һәм гомуми йорт ихтыяҗлары өчен кулланылган электр энергиясенә түләүләрне яңадан бүлү электр энергиясен исәпләүдә тайпылыш килеп чыгуга сәбәп булган. Счетчиксыз түләү счетчик буенча түләүгә караганда файдалырак булып чыккан, бу – гаделсезлек.
Әлеге проблемалы мәсьәләләрне чишү өчен, Татарстан Республикасы Хөкүмәтенең 87 нче номерлы яңа карары чыгарыла. Яңа чараларның асылы шуннан гыйбарәт: счетчик буенча түләү норматив буенча түләүгә караганда файдалырак булырга тиеш.
Татарстан Республикасы төзелеш, архитектура һәм торак-коммуналь хуҗалык министрының беренче урынбасары 1 нче марттан электр энергиясе өчен түләү тәртибенә кертеләчәк яңалыклар турында аңлатма бирде. Фатирларның барысы да счетчиклар белән тәэмин ителгән йортларда яшәүчеләр электр энергиясенә исәпләү приборлары күрсәткечләре буенча түләячәк, шуңа, үз өлешеңә туры китереп, гомуми йорт ихтыяҗлары өчен кулланылган электр энергиясенә түләү өстәләчәк. Счетчиклы һәм счетчиксыз фатирлар булган йортларда яшәүчеләр түбәндәгечә түләячәк: счетчиклы фатирда яшәүчеләр электр энергиясенә исәпләү приборы нигезендә түли, шуңа бер кешегә 7 кВт күләмендә гомуми йорт ихтыяҗлары өчен кулланылган электр энергиясенә түләү өстәлә; счетчиксыз фатирда яшәүчеләр норматив буенча түли, артык чыгым фатир мәйданына туры китереп түләнә.
Карарда шулай ук аз керемле гаиләләргә исәпләү приборларын алуда ярдәм итү чаралары да каралган. Хәзерге вакытта бер фазалы счетчикның базар бәясе – 450 – 500 сум.
Белешмә өчен: гомуми йорт ихтыяҗлары – ул күпфатирлы йорттагы уртак милекне тоту өчен кулланыла торган электр энергиясенең күләме. Уртак милек булып түбәндәгеләр санала: бу йортны карап тору, эксплуатацияләү һәм төзекләндерү өчен билгеләнгән инженерлык коммуникацияләре һәм башка объектлар урнашкан баскыч яны мәйданчыклары, баскычлар, лифтлар, лифт шахталары, коридорлар, техник катлар, чарлаклар, идән аслары.