Татарстан Республикасының яшьләр эшләре, спорт һәм туризм министры Марат Бариев: “Харбиндагы Универсиадада Татарстан спортчылары бөтен ил спортчылары белән лаеклы рәвештә ярыштылар”

Татарстан Республикасыннан утыз ике спортчы Россия Федерациясе җыелма командасы составында Харбиндагы (Кытай) ХХIV нче кышкы Универсиадада катнашкан, шуларның 31е медаль белән кайткан. Бүген Татарстан Республикасы Министрлар Кабинетында узган традицион брифингта бу турыда Татарстан Республикасының яшьләр эшләре, спорт һәм туризм министры Марат Бариев әйтте.
Россия җыелма командасы Харбиндагы кышкы Универсиададан барлыгы 51 медаль (18 алтын, 14 көмеш) алып кайткан. Универсиада 18 нче – 28 нче февраль көннәрендә узды.
Марат Бариев хоккей буенча җыелма команда уңышларын аерым билгеләп үтте. Аның составында Татарстан Республикасыннан 12 спортчы булган. Җыелма команданы оештыруда “Ак Барс” хоккей клубының вице-президенты Равил Шәвәлиев катнашкан. Команданы кирәк-ярак белән тәэмин итү һәм әзерлек җыеннарын оештыруда Татарстан Хөкүмәте һәм “Татнефть” ААҖ зур ярдәм күрсәткән.
“Гомумән алганда, без бөтен ил спортчылары белән лаеклы рәвештә ярыштык”, - диде Татарстан Республикасының яшьләр эшләре, спорт һәм туризм министры.
XXIV кышкы Универсиада барган көннәрдә республикабызда яшьләр иҗтимагый оешмасы кышкы Универсиададагы Татарстан җыелма командасына ярдәм йөзеннән акция үткәрде. Анда яшьләр һәм студентлардан берничә мең вәкил катнашты.
Марат Бариев сүзләренә караганда, якын арада республикада Белградта узачак җәйге Универсиадага әзерләнә башлаячаклар.
“Ни өчен федераль телеканалларда кайбер матчларның Харбиннан турыдан-туры трансляцияләре булмады?” дигән сорауга җавап биреп, Бариев әфәнде бу мәсьәләнең Россия Спорт, туризм һәм яшьләр сәясәте министрлыгын да борчуга салуын әйтте.
Марат Бариев сүзләренә караганда, 23 нче мартта Сочида узачак Физкультура һәм спорт буенча Президент советы утырышында бу сорауга җавап алынырга мөмкин. Аны Дмитрий Медведев үткәрәчәк. Утырышта каралачак мәсьәләләр арасында түбәндәгеләр бар: Сочида – 2014 ел Олимпиадасын, Казанда 2013 ел Универсиадасын үткәрүгә әзерлек, Россиядә студентлар спортын үстерү.
Татарстан Республикасы Яшьләр эшләре, спорт һәм туризм министрлыгының башлыгы Харбиндагы Универсиадада катнашкан Татарстан спортчыларына якын арада Татарстан Республикасы җитәкчелеге исеменнән рәхмәт белдереләчәген әйтте.