Татарстан Хөкүмәте башлыгы Рөстәм Миңнеханов Дублинда берничә очрашу үткәрде

Кичә, 3 нче мартта, Татарстан Республикасы Премьер-министры Рөстәм Миңнеханов, Ирландия башкаласы Дублинга эш визиты белән баргач, берничә очрашу үткәргән.
Шуны искәртик: Татарстан Хөкүмәте башлыгы Россиянең рәсми делегациясе составында Дублинда уза торган Эшлекле хезмәттәшлекне үстерү буенча хөкүмәтара Россия-Ирландия комитетының 7 нче утырышында катнаша.
Тышкы икътисади эшчәнлек буенча Татарстан Республикасы Премьер-министры ярдәмчесе Искәндәр Мөфлиханов кичә Рөстәм Миңнехановның утырыштан соң “Queen” һәм “Sepam” компанияләре җитәкчелеге белән очрашуын әйтте. Очрашуда икътисади хезмәттәшлек турында сүз барган.
Шуны да искәртик: “Queen” Ирландия компаниясе Россиянең зур инвестицион партнерларыннан берсе булып тора.
“Sepam” компаниясе алдынгы технологияләр базарында автоматлаштыру өлкәсендә (автомат контроль-исәпләү системалары, технологик, фәнни-тикшеренү эшләнмәләре) күрсәтелгән.
Бүген, 4 нче мартта, Дублинда Россия-Ирландия бизнес-форумы ачылачак. Форумда Ирландиянең чит ил эшләре министры, Россия Федерациясе Хөкүмәте рәисе – Россия делегациясе җитәкчесе Дмитрий Козак һәм Татарстан Республикасы Премьер-министры Рөстәм Миңнеханов доклад белән чыгыш ясаячак. “Россия төбәкләре. Бизнес өчен мөмкинлекләр” дигән семинар кысаларында Татарстан Республикасының икътисади потенциалын Татарстанның икътисад министры Марат Сафиуллин тәкъдим итәр дип көтелә.