Наталья Паршикова: Татарстан спорт чаралары өчен уңай төбәк буларак үсеш алачак

Бүген Казанда Идел буе физик культура, спорт һәм туризм академиясендә Казанда спортның кышкы төрләре индустриясенең X Халыкара конгрессы башланды.

Чарада статс-секретарь – РФ спорт министры урынбасары Наталья Паршикова, Татарстан Республикасы Премьер-министры Илдар Халиков, шулай ук ТР яшьләр эшләре һәм спорт министры Рафис Борһанов һ.б. катнашты.

Н.Паршикова, РФ спорт министры Виталий Мутко исеменнән, конгресста катнашучыларны сәламләп, киләчәктә Татарстан спорт чаралары өчен уңай төбәк буларак үсеш алачак, дип билгеләп үтте.

Аннары конгресста катнашучыларны , Татарстан Президенты Рөстәм Миңнеханов исеменнән, ТР Премьер-министры Илдар Халиков сәламләде.
“Спортка мөнәсәбәт үзенчәлекле, - дип ассызыклады Хөкүмәт җитәкчесе. – Соңгы елларда республикада профессиональ һәм массакүләм спортны үстерү өчен күп эш башкарылды”.
ТР Премьер-министры Татарстан территориясендәге спорт объектлары санын, бигрәк тә 40 ясалма бозлы мәйданчык турында искәртте. “Бу зур сан”, - дип белдерде ул.
“Безнең алга куелган зур бурычлар объектларда һәм уку процессында да югары дәрәҗәдә идарә итүне таләп итә”, - диде ул. И.Халиков чыгышын тәмамлаганда, бу мәсьәләләр буенча конгресс кысаларында фикер алышу булыр, дип ышануын белдерде. “Без тәҗрибә уртаклашырга әзер”, - диде ул.

Сәламләү өлешеннән соң, РФ спорт министры урынбасары “Массакүләм спорт өлкәсендә дәүләт сәясәтенең актуаль юнәлешләре” темасына доклад ясады.

ТР яшьләр эшләре һәм спорт министры Рафис Борһановның доклады эре спорт вакыйгаларының ТР да спортның кышкы төрләрен үстерүгә йогынты ясавына багышланган иде. Министр Универсиада спорт объектлары турында сөйләде.


Бу конгресс чираттагы “Россия-спорт державасы” форумына әзерлек этапларының берсе булачак. Спортның кышкы төрләре федерацияләре җитәкчеләре, боз сарайлары һәм тау чаңгысы комплекслары җитәкчеләре, төбәкләрнең махсуслаштырылган балалар-яшүсмерләр мәктәпләренең әйдәп баручы тренерлары Россиядә спортның кышкы төрләре үсеше перспективалары буенча фикер алышачак. Чара 29 майдан 30 майга кадәр дәвам итәчәк.