Илдар Халиков 2015 елда Казанда Спортның су төрләре буенча XVI дөнья чемпионатына әзерләнү һәм аны уздыру буенча киңәшмә уздырды

Татарстан Премьер-министры Илдар Халиков 2015 елда Казанда Спортның су төрләре буенча XVI дөнья чемпионатына әзерләнү һәм аны уздыруны гаять зур проект дип атады.

ТР Министрлар Кабинеты башлыгы, республиканың 2015 елда дөнья чемпионатын 2013 елдагы җәйге Универсиаданы уздырган кебек, шулай ук лаеклы итеп уздырачагына ышаныч белдерде. Бу хакта ул бүген ТР Хөкүмәте йортында узган киңәшмәдә белдерде.

Илдар Халиков сүзләренчә, XVI дөнья чемпионатында 180-190 илдән 2400 спортчы катнашачак, шуның белән бергә бу ярышларга бик күп санда җанатарлар һәм туристлар килер, дип көтелә. Ярышларның телеаудиториясен якынча 3 млрд. кеше тәшкил итәчәк.

Илдар Халиков бу спорт чарасының мөһимлеген югары бәяләде. Ул 2015 елда Казанда бер үк вакытта диярлек халыкара дәрәҗәдәге ике спорт чарасы узачагын белдерде, болар – Спортның су төрләре буенча XVI дөнья чемпионаты (24 июль - 9 август) һәм “Мастерс” турниры (5-16 август).

2015 елдагы дөнья чемпионатын уздыруга әзерлекнең барышы турында җентекләбрәк “Спорт проектларының башкарма дирекциясе” җитәкчесе Азат Кадыров сөйләде. Ул, аерым алганда, дөнья чемпионатына әзерлек буенча оештыру комитетын Россия спорт министры Виталий Мутко җитәкләвен, оештыру комитетының беренче киңәшмәсе 2013 елның декабрендә узганын хәбәр итте.

Дөнья чемпионаты барышында 147 объект, шул исәптән Спортның су төрләре сарае, “Казан-Арена” стадионы, Казансу елгасы акваториясе файдаланылачак, тренировкалар дүрт бассейнда – “Оргсинтез”, “Олимп”, “Акчарлак”, “Буревестник”та узачак, дип белдерде Азат Кадыров.

Ачылу һәм ябылу тантаналары “Татнефть-Арена” боз сараенда узар, дип көтелә.
Спорт чараларында катнашучыларны кунакханә, шифаханә, балалар лагерьларына урнаштырачаклар, ә төп яшәү урыны “Универсиада авылы”нда булачак.