Татарстанның хөкүмәт башлыгы шәһәр поликлиникаларының берсен төзекләндерү һәм аңа ремонт ясау эшләренә бәя бирде

Бүген Татарстан Республикасы Премьер-министры Рөстәм Миңнеханов Казандагы 7 нче номерлы шәһәр поликлиникасының ремонтланган һәм реставрацияләнгән бинасын карап чыкты.
“Апанаев йорты” исеме белән дә билгеле булган бинаны төзекләндерү эше 2006 елның маенда башланып киткән иде.
Башкарылган эшләр күләме 67 млн. сум тәшкил итә (бу сумманы муниципалитетлар акчасына компенсацияләргә уйлыйлар).
Ремонт 1,9 мең кв. метр мәйданда ясалган. Бинаны төзекләндерү һәм ремонт эшләрен “Грань” компаниясе (Казан) башкарган.
7 нче номерлы поликлиника бинасы республика өчен әһәмиятле архитектура һәм мәдәният һәйкәле булып тора.
Ремонттан соң монда көндезге стационар, тернәкләндерү бүлеге (йөрәк-кан тамырлары патологиясе, бронх һәм үпкә авырулары) һәм травматология пункты (беренче катта) урнашачак. Көндезге стационар Казанның Вахитов районы авыруларына исәпләнгән, травмпункт Татарстан башкаласының ике районы – Вахитов һәм Идел буе районнары кешеләренә хезмәт күрсәтәчәк.
Бинаны карау барышында Татарстан Премьер-министрына түбәндәгеләрне әйттеләр: поликлиника белән травмпункт авыруларны кабул итә башласын өчен, якынча 22 млн. сумлык җиһаз сатып алырга кирәк.
Татарстан Республикасы Премьер-министры белән бергә, бинадагы ремонт эшләренең сыйфатына Татарстан Республикасының сәламәтлек саклау министры Айрат Фәррахов, Казан мэры Илсур Метшин, Татарстан Республикасы Министрлар Кабинеты Аппаратының сәламәтлек саклау мәсьәләләре бүлеге башлыгы Борис Менделевич һәм башкалар бәя бирде.

Белешмә өчен:

Апанаев йорты Казанның үзәгендә урнашкан. Бу – Ф.Кәрим урамында кварталның яртысын һәм элекке Юнысов мәйданының көнчыгыш өлешен (Тукай урамы буенча) алып тора торган ике катлы бина. Апанаев йортының архитекторы – М.Н.Литвинов. Йорт берничә тапкыр төзелгән (1848 һәм 1861 елларда), 1916 елда йортның алгы өлеше эклектика формасында үзгәртелгән.
“Апанаев йорты” янында 1861 елда төзелгән өч катлы поликлиника бинасы бар. Аның мәйданы – 1,6 мең кв. метр.