Илдар Халиков: ”Камгэсэнергострой”ның горурланырлыгы бар

2014 елның 13 августы, чәршәмбе
Бүген Татарстан Премьер-министры Илдар Халиков Чаллыда булды. Республиканың Хөкүмәт башлыгы “Камгэсэнергострой” ААҖнең 50 еллыгы уңаеннан уздырылган тантанада катнашты һәм берничә объектны карады.

Беренче булып “Татэлектромонтаж” предприятиесендә булды. Монда Премьер-министрга яктырту баганаларын җитештерүче яңа цехны күрсәттеләр. Проектны гамәлгә ашыру барышында 70 яңа эш урыны булдырылган. Завод барлык норма һәм стандарт таләпләренә җавап бирерлек заманча көнкүреш биналары белән җиһазландырылган.

“Камгэсэнергострой” ААҖнең җитештерү базасында Илдар Халиков предприятиенең үзен карады, шулай ук музейда булды, хезмәт ветераннары белән аралашты. “Сезнең тәҗрибәгез безнең өчен бик мөһим”,- диде Илдар Халиков.

Аннан соң, Илдар Халиков, “Энергетик” мәдәният йортында компаниянең юбилее уңаеннан уздырылган бәйрәм тантанасында катнашты. Бәйрәм кунакларына мөрәҗәгать итеп, Илдар Халиков ТР Президенты һәм Дәүләт Советы исеменнән барысын да котлады.
“Камгэсэнергострой”ның горурланырлыгы бар,- диде ул. – 50 ел – ул төзелгән шәһәр һәм заводлар, электростанцияләр һәм торак йортлар, спорт һәм сәламәтлек саклау объектлары”.

Илдар Халиков “Камгэсэнергострой”ның барлык хезмәткәрләренә сәламәтлек, бәхет һәм уңышлар теләде, җитештерү алдынгыларына бүләкләр тапшырды.

ЯҢАЛЫКЛАРГА ЯЗЫЛУ
Все материалы сайта доступны по лицензии:
Creative Commons Attribution 4.0 International