ТР Икътисад министрлыгы коллективына яңа җитәкче тәкъдим ителде

Бүген Артем Здунов Татарстан Республикасы Икътисад министрлыгы коллективына министр вазыйфасында тәкъдим ителде. ТР Премьер-министры вазыйфаларын башкаручы Алексей Песошин хезмәткәрләрне яңа җитәкче билгеләнү белән таныштырды.

Алексей Песошин ТР Икътисад министрлыгы актлар залында җыелучыларга мөрәҗәгать итеп, ТР Президентының Мидхәт Шаһиәхмәтовның элеккеге министр вазыйфасыннан азат ителүе һәм республиканың Милли банкы җитәкчесе вазыйфасына билгеләнүе турындагы указын укыды. Ул М.Шаһиәхмәтовка министрлык җитәкчелеге вазыйфасында башкарган эшләре өчен рәхмәт белдерде.

“Аның министр вазыйфасында эшләү чорында, республика Россия икътисадында алдынгыларның берсе буларак, үз позициясен шактый ныгытты, - дип ассызыклады А.Песошин. – 2010 елдан Татарстан хакимият органнары эшенең нәтиҗәлелеге күрсәткечләре буенча беренче урынны били”.
Алексей Песошин Мидхәт Шаһиәхмәтовка ТР Президентының Рәхмәт хатын тапшырды һәм уңышлар теләде.

Аннан соң Алексей Песошин, 4 ел дәвамында министр урынбасары вазыйфасын башкарган Артем Здуновның Татарстан Республикасы икътисад министры итеп билгеләнүе турындагы Указны укыды.

“Министрлык өчен Артем Здунов яңа кеше түгел. Ул хәзер бик актуаль һәм кирәкле булган инвестицияләр, инновацияләр тармагы буенча эшләде. Яңа министр ТР Икътисад министрлыгының бу системалы эшен дәвам итәр дип ышанам”, - дип белдерде Алексей Песошин һәм министрга символик портфельне тапшырды.

Белешмә өчен:
Здунов Артем Алексеевич
1978 елның 18 маенда Казанда туган
2000 елда Казан финанс-икътисад институтын тәмамлаган
1996-1998 елларда - шушы институтның студентлар профкомы рәисе урынбасары
2000-2001 елларда - "Промышленная страховая компания"дә иминиятләштерү буенча белгеч, эчке аудитор
2001-2004 елларда - Казан финанс-икътисад институты аспиранты
2004-2006 елларда - шушы институтның макроикътисад һәм икътисад теориясе кафедрасы укытучысы
2006-2010да - ТР Фәннәр академиясенең Перспективалы икътисади тикшеренүләр үзәгендә директор урынбасары
2010-2014 елларда ТР икътисад министры урынбасары
2014 елның октябреннән ТР икътисад министры
Икътисад фәннәре кандидаты (2005 ел). Инглиз телен белә (Business English Certificate, University of Cambridge). ТР ФАнең "2009 елның иң яхшы галиме" конкурсы җиңүчесе.
Гаилә хәле: өйләнгән, улы һәм кызы бар.