Казанда республика мәгариф учреждениеләренең авыл хуҗалыгы ярминкәсе узды

Татарстан мәгариф учреждениеләренең традицион авыл хуҗалыгы продукциясе ярминкәсе бүген Казанда узды. Агросәнәгать паркында урнаштырылган сәүдә рәтләрендә ТР Премьер-министры Илдар Халиков булды. Аны ТР вице-премьеры – авыл хуҗалыгы һәм азык-төлек министры Марат Әхмәтов, ТР вице-премьеры – мәгариф һәм фән министры Энгель Фәттахов, ТР хезмәт, мәшгульлек һәм социаль яклау министры Эльмира Зарипова озата йөрде.

Татарстан мәгариф учреждениеләренең ел саен уздырыла торган ярминкәсе беренче тапкыр бик зур күләмдә узды. Агросәнәгать паркы мәйданчыгында республиканың барлык муниципаль берәмлегеннән үзләре җитештергән авыл хуҗалыгы продукциясен тәкъдим иттеләр. Барлыгы ярминкәдә 60лап мәктәп һәм профильле урта һөнәри белем бирү учреждениесе катнашты. Алар Казанга бәрәңге, суган, кишер, чөгендер, ит, шулай ук халык һөнәрчелеге товарларын алып килгәннәр иде.

Татарстан Премьер-министры Илдар Халиков сәүдә рәтләрен карады, сатучылар һәм укучылар белән аралашты, аннан соң сәхнәдән ярминкәдә катнашучыларга һәм кунакларга мөрәҗәгать итте.

Хөкүмәт башлыгы беренче чиратта укытучыларга рәхмәт әйтте. “Сезнең хезмәтегез ярдәмендә шундый яхшы ярминкә барлыкка килде, Россиядә аңа тиңнәр бармы икән әле”,-дип белдерде ул.

Авыл хуҗалыгы хезмәткәрләрен практикада өйрәтү – Татарстан мәгарифендә күптәннән килгән яхшы традиция. “Авыл хезмәткәрләрен класста гына түгел, кырда да тәрбияләүнең әһәмиятле булуын вакыт та раслады”, - дип ассызыклады ТР Премьер-министры.

Казанлылар исеменнән ул шулай ук агросәнәгать паркына үзенең продукциясен алып килеп, республика башкаласы халкын түбән бәядән сыйфатлы продукция белән тәэмин итүчеләрнең барысына да рәхмәт белдерде.