Татарстан Республикасы Инвестицион үсеш агентлыгы коллективына яңа җитәкчене тәкъдим иттеләр

Бүген Татарстан Премьер-министры Илдар Халиков Инвестицион үсеш агентлыгы коллективына яңа җитәкче - Талия Миңнуллинаны тәкъдим итте.

Очрашуда Илдар Халиков хәбәр иткәнчә, Инвестицион үсеш агентлыгының элекке җитәкчесе Линар Якуповка яңа эш тәкъдим ителде, һәм ул Татарстан Президентына бу тәкъдимне хуплавын сорап мөрәҗәгать итте. “Ышанам, Линар Якупов яңа урында да күп эшләр башкарыр, шул исәптән республика өчен дә”, -дип белдерде ул.

Илдар Халиков уңышлы эшләре өчен Линар Якуповка һәм агентлык коллективына рәхмәт белдерде.

Агентлыкның яңа җитәкчесен тәкъдим итеп, Илдар Халиков, аның ТР Икътисад министрлыгында эш тәҗрибәсе булуын, соңгы елларда ТР Президенты Аппаратында эшләвен хәбәр итте. “Талия Миңнуллина эшне дәвам итеп кенә калмыйча, агентлык эшчәнлегенә яңалык та кертер”,- дип ассызыклады ул.

Илдар Халиков Талия Миңнуллинага Татарстан Хөкүмәте әгъзасының символик портфелен тапшырды.

Белешмә өчен:
Миңнуллина Талия Илгиз кызы 1985 елның 24 апрелендә Казанда туа. Татар дәүләт гуманитар-педагогика университетын “Чит тел” белгечлеге буенча тәмамлый (2007). Бөекбританиядә магистрлык программмасы буенча, СКОЛКОВОда (Мәскәү) һөнәри яңадан әзерлек программасы буенча укый.

Хезмәт эшчәнлеген ТР Икътисад һәм сәнәгать министрлыгының Инвестицион һәм инновацион эшчәнлек идарәсендә өлкән белгеч вазыйфасында башлый.

2010 елда Татарстан Республикасы Президенты Аппаратына эшкә күчә.

2013 елдан Татарстан Республикасы Президенты каршындагы Дәүләт хезмәт һәм кадрлар департаментында бүлек мөдире иде.