Татарстанның Алабуга районында реконструкцияләүдән соң "Идел" М7 автомобиль трассасы участогы ачылды

Бүген тантаналы рәвештә “Идел” М-7 автомобиль юлында 978-1011км участогында транспорт хәрәкәте ачылды. Бу чарада Татарстанда Премьер-министр Илдар Халиков, Федераль юл агентлыгы җитәкчесе Роман Старовойт, ТР транспорт һәм юл хуҗалыгы министры Ленар Сафин һ.б. катнашты.

Юлчыларны "Идел" М7 автомобиль трассасы участогы ачылу белән котлап, Илдар Халиков аларга сыйфатлы эшләре һәм аны планлаштырылганнан бер ел алдан тәмамлаганнары өчен рәхмәт белдерде.
 
"Татарстанлылар исеменнән зур рәхмәт сезгә. Бу республика өчен менә дигән бүләк. Казан һәм Чаллы зонасының күп кенә шәһәрләрендә яшәүчеләр бу трассада эшләр бетүне түземсезләнеп көтә. Бу юл Татарстанның күп кенә зур предприятиеләре: "КАМАЗ", "Түбәнкаманефтехим", "Казаноргсинтез" заводларының эшен тәэмин итә", - дип белдерде республика Хөкүмәте башлыгы.

"Юл бик уңайлы һәм куркынычсызга әйләнде. Тагын 70 чакрымы кала. Ике елда юл төзүчеләр реконструкцияне тәмамлар дип уйлыйм", - дип өстәде ул.

Юлның сыйфатын "КАМАЗ-Мастер" спорт командасы узышчылары да сынап карады. "Биредә бик тигез. Бу юлны төзүләре яхшы, Казан белән Чаллы арасында транспорт хәрәкәте тизләнәчәк. Полосалар киң, ерак араларга йөрүчеләр һәм зур йөк машиналары хуҗалары канәгать калыр дип уйлыйм", - дип белдерде команда әгъзасы Айрат Мәрдиев.

Автомобильче һәм юлчыларны котлап, Илдар Халиков,бу юл үткәргеч завод һәм предприятиеләр арасында яхшы транспорт хәрәкәтен тәэмин итәчәк, димәк яңа инвестицияләр җәлеп ителеп, өстәмә эш урыннары булдырылачак, дип билгеләде.