“Россия төбәкләре һәм шәһәрләрендә стратегик планлаштыру” форумында “Татарстанның үсеш стратегиясе өстенлекләре” темасына түгәрәк өстәл узды

Татарстан Республикасының 2030 елга кадәр социаль-икътисади үсеш стратегиясе проектының беренче редакциясе декабрь уртасында тәкъдим ителәчәк. Бу хакта бүген XIII Бөтенроссия "Россия төбәкләре һәм шәһәрләрендә стратегик планлаштыру" форумы кысаларында узган "Татарстанның үсеш стратегиясе өстенлекләре" темасына узган түгәрәк өстәлдә Леонтьев үзәге каршындагы стратегик планлаштыру буенча ресурс үзәге директоры, "Татарстан-2030" проекты фәнни җитәкчесе Борис Жихаревич хәбәр итте.

Түгәрәк өстәлне оештыручылар - ТР Премьер-министры Илдар Халиков һәм Гражданнар инициативалары комитеты рәисе, "Татарстан-2030" проектының эксперт советы рәисе Алексей Кудрин.

Төп докладны Борис Жихаревич ясады. Ул Татарстан өчен Стратегия проектын эшләү турында сөйләде. Леонтьев үзәге һәм республика хакимият органнары тарафыннан зур эш башкарылган: эшче төркемнәр һәм проект мәйданчыклары булдырылган, бизнес, мәгариф, фән өлкәсендәге кешеләр катнашында күп санлы чаралар уздырылган. Стратегиянең иң югары максаты - ул кеше, дип ассызыклады Жихаревич. Киләчәктә үсеш өчен кеше капиталы белән эшләү кирәк, иҗтимагый институтлар булдыру кирәк, шулай булганда иктисадта кеше капиталына ихтыяҗ булачак һәм уңышлы эшли алачак.

Түгәрәк өстәл барышында Татарстанның кадрлар потенциалы, хезмәт ресурслары миграциясе, шул исәптән төбәктән яшьләр китү мәсьәләләре турында да фикер алыштылар.

Кадрлар мәсьәләсе - беренче мәсьәлә булып тора. Яшьләрне сөйләшүләр белән генә тотып калып булмый, эш юк икән - яшьләр китә", - дип ассызыклады Илдар Халиков. Уңай мисал буларак ул ИТ-тармакны китерде. Биредә кадрлар китү проблемасы юк. Моңа тармакка булышу, эш урыннары, ИТ-парклар булдыру, шулай ук зур күләмле ИТ-проект - Иннополис инновацияләр шәһәрен гамәлгә ашыру, ИТ-университет оештыру ярдәм итә.

Кадрлар потенциалы һәм Татарстанда югары технологияле эш урыннары булдыру сәясәте турында ТР икътисад министры Артем Здунов сөйләде.

Түгәрәк өстәл тәмамлангач, Илдар Халиков форумда аккредитацияләнгән федераль ММЧ вәкилләре сорауларына җавап бирде.