ТР Премьер-министры ТР Дәүләт Советының бюджет буенча комитет утырышында катнашты

Бүген ТР Дәүләт Советының бюджет, салымнар һәм финанслар комитеты утырышында парламент депутатлары, министрлык һәм ведомство вәкилләре “2015 елга һәм 2016-2017 елларның планлы чорына Татарстан Республикасы бюджеты турында” закон проектына төзәтмәләр кертү хакында фикер алыштылар. Аны комитет рәисе Леонид Якунин алып барды. Утырышта ТР Премьер-министры Илдар Халиков һәм ТР Дәүләт Советы рәисе урынбасары Юрий Камалтынов катнашты.

ТР бюджеты турында закон проектына барлыгы 133 төп төзәтмә һәм ике өстәмә төзәтмә килгән, шуларның күпчелеге ТР Министрлар Кабинеты тарафыннан кертелгән, 30 – ТР Дәүләт Советында КПРФ фракциясе, 2 – ТР Дәүләт Советының бюджет, салымнар һәм финанслар буенча комитеты тарафыннан.

ТР финанс министры Радик Гайзатуллин, бюджет проектын караганнан соң, бюджетка кертелә торган үзгәрешләрне өч блокка бүлеп карарга мөмкин булуын белдерде. Аның беренчесе федераль бюджет, икенчесе Татарстанның киләсе елга кабул ителә торган бюджет проектын редакцияләү, өченчесе исә яңа кабул ителгән норматив хокукый актларга бәйле. Республика Хөкүмәте төзәтмәләре комитет әгъзалары тарафыннан хупланды. Гомумән, бюджетның керем өлешен 1 741 411 900 сумга арттыру тәкъдим ителә, чыгым өлешен – 1 837 414 200 сумга, шуның белән бергә дефицит 96 002 300 сумга арта.

КПРФ фракциясе керткән 22 төзәтмә партиянең үз инициативасы белән кире алына, 8 төзәтмәне бүген комитет әгъзалары кире какты. Төзәтмәләрне кире кагу буенча нигезләмәләрне ТР финанс министры урынбасары Алла Анфимова тәкъдим итте.

Төзәтмәләрнең гомуми таблицасын карап, депутатлар комитет карарын кабул иттеләр, анда ТР Дәүләт Советына икенче һәм өченче укылышта бюджет турында закон проектын карарга һәм кабул итәргә тәкъдим иттеләр. Шулай ук Дәүләт Советына икенче һәм соңгы укылышта Мәҗбүри медицина иминиятләштерүенең территориаль фонды бюджеты турында закон проектын карау һәм кабул итү тәкдим ителде.