Сарман районының җитәкчесе алышынды

Сарман муниципаль районының башкарма комитеты җитәкчесе вазифаларын башкаручы итеп Фәрит Хөснуллин билгеләнде, ул элек район авыл хуҗалыгы һәм азык-төлек идарәсен җитәкләгән. Мондый карарны бүген Сарман район советы депутатлары кабул итте, Сессия эшендә Татарстан Премьер-министры Илдар Халиков катнашты.

Утырыш башланыр алдыннан ТР Хөкүмәте башлыгы Сарманда “Дулкын” исемле яңа спорт-сәламәтләндерү комплексын ачты. Бу объект ике елда төзелгән, аның гомуми бәясе 108 млн сум тәшкил иткән.

Сарман муниципаль район советы утырышында депутатлар ТР Премьер-министры катнашында район башлыгы Нәфис Закировның үз теләге белән эштән китү мәсьәләсен карадылар. Ул “Татнефть” ААҖнә яңа эшкә күчә.

Илдар Халиков сүзләренчә, хәзерге вакытта Сарман районы республика районнары арасында лаеклы урынны алып тора. “Районның 15 елдагы казанышлары – бу күбесенчә җитәкченең хезмәте. Үзенең эшен ул кризис вакытында башлады, һәм аны лаеклы итеп уза алды”, - диде ул.

Татарстан Президенты исеменнән Илдар Халиков тырыш хезмәте өчен Нәфис Закировка рәхмәт белдерде, сәламәтлек, киләчәктә уңышлар теләде һәм аңа “Татарстан Республикасының җирлеүзидарә үсешендәге казанышлар өчен” медален тапшырды.

Фәрит Хөснуллинны тәкъдим итеп, Илдар Халиков, аның район халкына таныш кеше булуын билгеләп үтте. “Сез аны яхшы беләсез. 13 ел районда җитәкче урыннарда эшләде. Фәрит Хөснуллин үз вазифаларын уңышлы башкарыр дип ышанам”, - диде ул.

Депутатлар Фәрит Хөснуллинның район башкарма комитеты җитәкчесе вазифаларын башкаручы итеп билгеләнүенә тавыш бирделәр.