Казанда "Чиста караш" конкурсында җиңүчеләрне бүләкләделәр

Бүген Казанда "Чиста караш" республика яшьләр социаль экологик реклама ачык конкурсында җиңүчеләрне бүләкләделәр. Жюри эше нәтиҗәләре буенча видеоролик, кыска метражлы фильм, гаджетка төшерелгән видео, социаль плакат һәм фотоэшләр номинацияләре буенча 15 эш иң яхшысы дип табылган.

Бүләкләү тантанасында катнашкан ТР Дәүләт Киңәшчесе Минтимер Шәймиев сүзләренчә, хәзерге вакытта әйләнә-тирә мохитны саклау мәсьәләсе бик актуаль, ә мондый конкурслар яшьләрдә әйләнә-тирә мохитны чиста саклау гадәтен булдыруга ярдәм итә.

Минтимер Шәймиев фикеренчә, "Чиста караш" конкурсы өлкәннәргә балалар күзлегеннән хәлләрнең чынлыкта ничек торышын күрү мөмкинлеген бирә. Ул Татарстан Экология һәм табигый ресурслар министрлыгына әлеге башлангыч өчен рәхмәт белдерде. Аннары ул "Социаль ролик" номинациясендә җиңгән Алтай краеның Усть-Калманка авылы кызы Марина Ясеневага бүләк тапшырды.

"Яшел Россия" гомумроссия экологик иҗтимагый хәрәкәте президенты, шахмат буенча 12нче дөнья чемпионы, РФ Федераль Җыены Дәүләт Думасы депутаты Анатолий Карпов фикеренчә, мондый конкурслар анда катнашучыларда әйләнә-тирә мохитка аерым караш формалаштыруга ярдәм итә. "Андый чараларда катнашучылар, беркайчан да чүпләмәячәкләр һәм аларда әйләнә-тирә мохитка сакчыл караш булачак", - дип ассызыклады ул.

Татарстан экология һәм табигый ресурслар министры Артем Сидоров сүзләренчә, "Чиста караш" ачык республика конкурсы инде өченче тапкыр уза. Әлеге вакыт аралыгында ул шактый танылып өлгергән, катнашырга теләп гариза бирүчеләр саны арта, ел саен конкурсның географиясе киңәя, күбрәк төбәкләр катнаша. "Быел Россиянең 53 субъектыннан 1 меңгә якын эш тәкъдим ителде. Бу бик күп һәм без алга таба эшләр тагын да күбрәк булыр дип өметләнәбез", - диде ул.

Сүз уңаенда, узган ел экспертлар хөкеменә тәкъдим ителгән эшләр 600гә кимрәк булган. Быел конкурс материаллары саны буенча Төмән, Волгоград, Иркутск, Камчатка, Мәскәү, Мурманск, Чиләбе, Пенза, Уфа, Сарытау, Ханты-Манси, Санкт-Петербург, Чуашстан, Чиләбе һәм Татарстан лидер булган. Беренче тапкыр Коми, Адыгия һәм Әрмәнстаннан эшләр тәкъдим ителгән.

Гаризалар ТР экология һәм табигый ресурслар министры Артем Сидоров, ТР Дәүләт Советы Рәисе урынбасары Римма Ратникова, «Связьинвестнефтехим» ААҖ Директорлар советы рәисе киңәшчесе Кафил Әмиров, "Яңа гасыр" ТРК ААҖ генераль директоры Илшат Әминов, «Татарстан» ДТРК директоры Фирдүс Гыймалетдинов, "Казань" ТРК генераль директоры Мәдинә Тимерҗановалар кергән эксперт советы тарафыннан каралган.

Конкурс нәтиҗәләре буенча 15 кеше диплом һәм кыйммәтле бүләкләр алды. Ярославльдән Станислав Яблоков (социаль плакат), Алтай краеннан Марина Ясенева (социаль видеоролик), Алабугадан Айдар Хуҗиәхметов (кыска метражлы фильм), Чаллыдан Ренат Гафуров (гаджетка төшерелгән видео) үз номицияләрендә җиңүче булды. Ярославльдән Юлия Алексашова, Ольга Кулакова һәм Ольга Кулибиналарның эше “Фотоэш”номинациясендә беренче дип табылды.