Татарстанда 2014 елның 9 аенда халыкка күрсәтелгән туристлык хезмәтләре 8 млрд сумнан арткан

Агымдагы елның 11 аенда Татарстанда туристлар агымы 2013 ел күрсәткеченнән артып киткән. Бу хакта бүген Татарстан Хөкүмәте йортында “Туристлык елына нәтиҗә һәм яңа ел каникулларында чаралар” темасына багышланган брифингта Татарстан Республикасының Туризм буенча дәүләт комитеты рәисе Сергей Иванов белдерде.

“2014 елның 11 аенда Татарстанда 2,3 млн турист һәм экскурсант булган. 2013 ел нәтиҗәләре буенча бу сумма гомумеллык күрсәткечтән югары. Ул вакытта республикада 2 млн 150 мең кеше булган. Кунакханә секторы тиз үсеш алды”, - диде ул.
Сергей Иванов сүзләренә караганда, агымдагы елның 9 аенда күрсәтелгән хезмәт күләме 8 млрд 360 млн сум тәшкил иткән, шул ук вакытта 2013 елгы гомумкүрсәткеч 8 млрд 300 млн сум тәшкил иткән.

Аерым объектларда булучылар саны буенча да күрсәткечләрнең яхшы булуы күзәтелә. Бүген журналистларга белдерүләренчә, 20 ноябрьгә булган мәгълүматларга караганда, Казан Кремле территориясендә экспозицияләрдә һәм мәдәни чараларда 1 млн 415 мең турист булган, узган ел – 1 млн 215 кеше.

Зөя утрау-шәһәрчеге территориясендә дә туристлар саны ике тапкыр диярлек арткан, 2013 елда утрау-шәһәрчектә 106 мең кеше булса, быел – 180 меңнән артык. Алабугага туристлар агымы 360 мең кешедән 542 меңгә кадәр арткан.