Татарстанда 2015 елда чәчүлекләрнең күләме элеккеге дәрәҗәдә сакланачак

Татарстан җитәкчелеге 2015 елда игенчелекнең күләмен түбән төшерүне планлаштырмый, чәчүлекләрнең мәйданын узган ел дәрәҗәсендә саклау планлаштырыла – 2,9 млн гектар. Бу хакта бүген видеоконференцэлемтә режимында узган республика киңәшмәсендә ТР вице-премьеры – ТР авыл хуҗалыгы һәм азык-төлек министры Марат Әхмәтов хәбәр итте. Киңәшмәне Татарстан Премьер-министры Илдар Халиков уздырды.

Беренче чиратта министр үзенең докладында 2014 елгы игенчелеккә нәтиҗә ясады. Гомумән республика буенча 6,1 млн тонна игенчелек продукциясе җитештерелгән.
Мәйданы 590 мең гектар булган уҗым чәчүлекләренә килгәндә, аларга бернәрсә дә куркыныч тудырмый, дип белдерде Марат Әхмәтов.

Яңа чәчүгә әзерләнүдә иң катлаулы мәсьәлә буларак, министр, финанслар белән тәэмин итүне атады. Барлыгы Татарстанда чәчү компаниясенә 17 млрд сумнан артык кирәк булачак.

Марат Әхмәтов кирәкле материал ресурсларга (ашлама, саклану чаралары, запас частьләр, орлык) бәяләрнең үсүен белдерде. “ Язга бу ресурслар тагын да кыйммәтрәк булачак. Шуңа күрә, кемнең финанс мөмкинлекләре бар, озакка сузмыйча аларны алып куегыз”, - мөрәҗәгать итте министр хуҗалык җитәкчеләренә.

Министрның докладын шәрехләп, Илдар Халиков, агросәнәгатьтә дә, гомумән икътисадта да 2015 ел катлаулы булачак, диде. “Бәяләрнең үсүе котылгысыз, моннан тыш, финанслар дефициты да булачак. Ләкин ышанам, ниһаять начар һава шартлары циклы тәмамланды”, - дип йомгаклады Илдар Халиков.