Илдар Халиков Түбән Камада шәһәрнең юбилеена әзерлек буенча киңәшмә уздырды

Бүген Түбән Камада шәһәрнең 50 еллыгын бәйрәм итү кысаларында Татарстан Премьер-министры Илдар Халиков катнашында беренче күчмә киңәшмә узды.

Искә төшерәбез, августта Татарстан Республикасы Президенты Рөстәм Миңнеханов Түбән Каманың 50 еллыгын 2016 елда бәйрәм итү турында указны имзалады. Юбилейга әзерләнү буенча оештыру комитеты составына ТР Хөкүмәте башлыгы рәислегендә 22 кеше кергән.

Киңәшмә башланганчы оештыру комитеты әгъзалары шәһәрнең беренче зур юбилеена бүләк итәсе килгән берничә объектны карадылар.

Беренче чиратта Мәдәни үзәк бинасын карадылар. Түбән Кама муниципаль районы башлыгы, Түбән Кама мэры Айдар Метшин бу бинаның тарихы белән таныштырды.

Аннан соң киңәшмәдә катнашучылар балалар хастаханәсенә юнәлделәр. Бу күп профильле учреждениесе, ул акушерлык һәм педиатрия стационарларын берләштерә. Хәзерге вакытта больницага капиталь ремонт кирәк.

Илдар Халиков Түбән Камада караган тагын бер объект – ул Түбән Кама үзәк район больницасы. Аңа бүген Түбән Камада гамәлгә кертергә теләгән бердәм кабул итү-диагностика бүлеге төзелешенең проектын күрсәттеләр.

Киңәшмәне ачып, Илдар Халиков юбилей датасына булган игътибарның очраклы булмавын белдерде.Түбән Кама Татарстанда гына түгел, ә бәлки Россиядә дә зур сәнәгать үзәге санала, ул илнең иң зур нефть химиясе үзәкләренең берсе, анда ТР тулай продуктының 9%ы җитештерелә.
“Түбән Каманың 50 еллыгы уңаеннан булачак чаралар югары дәрәҗәдә узарга тиеш”, - дип ассызыклады ТР Премьер-министры.

Илдар Халиков Түбән Каманың зур сәнәгать предприятиеләре – “Татнефть” һәм “ТАИФ” компанияләре җитәкчеләренә шәһәр тормышында актив катнашулары өчен рәхмәт белдерде. Ул шәһәрнең 50 еллыгын бәйрәм итүгә әзерлек эшләрендә предприятиеләр актив катнашыр дигән ышаныч белдерде.
“Шәһәрнең юбилее – ул барлык предприятиеләрнең, барлык хезмәткәрләрнең бәйрәме”,- дип ассызыклады Премьер-министр.