“Татарстан Республикасының Электрон Хөкүмәте” проектына Британия институты премиясе бирелгән

Республикабызның “Татарстан Республикасының Электрон Хөкүмәте” комплекслы проектын кертүдәге уңышлы тәҗрибәсе Лондонда бара торган Бөтендөнья алдынгы технологияләр форумында югары бәяләнгән. Британия технология һәм электрон коммерция институтының “Электрон Хөкүмәт ярдәмендә уңышлы идарә итү” исемле премиясен («Award of British institute of technologies and E-commerce») Татарстан Республикасы Премьер-министры Рөстәм Миңнехановка лорд Әхмәт Роттерхамский тапшырган. Бүген бу турыда журналистларга биргән интервьюсында тышкы икътисади эшчәнлек буенча Татарстан Республикасы хөкүмәт башлыгының ярдәмчесе Искәндәр Мөфлиханов әйткән. Моннан тыш, Британия институтының “Технологияләр өлкәсендә лидер” дигән премиясенә 2000 елда физика өлкәсендә Нобелев премиясе лауреаты булган Жорес Алферов лаек булган.
Искәндәр Мөфлиханов сүзләренә караганда, Британия технология һәм электрон коммерция институты премияләре 7 нче октябрь кичендә төрле номинацияләр буенча тапшырылган. Тантана Фән музеенда узган.
Премьер-министр ярдәмчесе әйткәнчә, лорд Әхмәт Роттерхамский, премияне тапшырганда, “Татарстан Республикасы Электрон Хөкүмәте” системасының Бөек Британиядәге шундый ук проекттан күпкә өстен булуын билгеләп үткән. Үз чиратында, Рөстәм Миңнеханов форум эше кысаларында чит илләрдән килгән коллегаларга Татарстанның икътисади потенциалын тәкъдир иткән.
“Беренче чиратта, премия – ул танылу. Британия технология һәм электрон коммерция институтында эшләүче коллегаларыбыз “Электрон Хөкүмәт” өлкәсендә Сингапур белән тыгыз хезмәттәшлек итәләр, алар БДБ, Азия илләре дәүләт органнарының эш системасы турында барысын да диярлек беләләр. Димәк, чагыштырырлык урын бар.
Искәндәр Мөфлиханов сүзләренә караганда, Татарстан Россиядә “Электрон Хөкүмәт” проектын беренчеләрдән булып кертә. “Күп кенә параметрлар буенча безнең системаның аналоглары юк. Россиядә әлегә ике платформа гына үстерелә, шуларның берсе – Татарстанда”, - дип билгеләп үтте ул.
Тулырак - http://www.tatar-inform.ru/news/2009/10/09/188255/