Илдар Халиков Түбән Камада яңа сквер ачылу тантанасында катнашты

Бүген Түбән Камада, Мурадьян урамында, яңа сквер ачылды. Бу тантаналы чарада Татарстан Республикасы Премьер-министры Илдар Халиков, Түбән Кама муниципаль районы башлыгы Айдар Метшин катнашты.

Парклар һәм сквералар елы кысаларында бу Түбән Камадагы икенче зур проект. Яңа скверны булдыру "Татнефть" һәм "ТАНЕКО" компанияләре катнашында гамәлгә ашырылган, алар проектны финанслауны үз өстенә алган, шулай ук территорияне төзекләндерү эшләрен башкарган.

Түбән Кама халкын "ТАНЕКО" исемен алган яңа сквер ачылу белән котлап, Илдар Халиков, Түбән Камада тагын бер яңа парк барлыкка килде, дип билгеләде. "Моңа кадәр мин күптән түгел ачылган Тукай исемендәге уку һәм ял паркында булдым, анда бик сокланып йөрдем. Һәм менә тагын бер гаҗәеп сквер. Бары Түбән Камада гына шулай уйлап таба, аннан соң шуны тормышка ашыра алалар. Бәйрәм белән сезне, кадерле дуслар! Шәһәр көне һәм якынлашып килүче Татарстан Республикасы көне белән!"- диде ул.

Яңа скверның иң биек конструкциясе - 22,5 метр биеклектәге ясалма чыршы. Хәзер аны зур матур чәчәкләр бизи, ә кышын Яңа ел уенчыклары һәм утлар бизәячәк.
Аерым игътибар яңа сквер территориясендә балалар ялына бирелгән. Монда алар өчен ике уен мәйданчыгы урнаштырылган.

Айдар Метшин барлык Түбән Кама халкы исеменнән шәһәрнең туган көненә ясалган бүләк өчен “Татнефть” һәм “ТАНЕКО” компанияләренә рәхмәт белдерде.
Бу хакта Түбән Кама муниципаль районының рәсми сайтында хәбәр ителгән.