Татарстан Республикасы Премьер-министры Илдар Халиков катнашында Түбән Камада югары технологияле поликлиника ачылды

Бүген Татарстан Республикасы Премьер-министры Илдар Халиков Түбән Камада югары технологияле поликлиника ачылу тантанасында катнашты.
“Бу вакыйгага без 23 ел дәвамында килдек”, - дип билгеләде Түбән Кама муниципаль районы башлыгы, Түбән Кама мэры Айдар Метшин.

Яңа медицина объектының бәясе 327 млн. сум. Поликлиника 80 меңнән артык кешегә хезмәт күрсәтәчәк.

Поликлиникада кешеләр уңайлылыгы өчен кирәкле барлык шартлар да булдырылган: лаборатория, функциональ диагностика, нур диагностикасы блоклары, җиңел автомобильләр өчен уңайлы парковка һ.б., "Уңайлы мохит" программасы таләпләре дә үтәлгән.

Айдар Метшин ярдәм иткәннәре өчен Татарстан Республикасы җитәкчелегенә рәхмәт белдерде. Ул шулай ук ТР Министрлар Кабинетына, Баш инвестиция-төзелеш идарәсенә, төзүчеләргә рәхмәт сүзләрен җиткерде.

Поликлиника киләсе атна азагында тулы көченә эшли башлаячак. Яңа үзәк ачылу Түбән Кама халкына үз вакытында беренчел амбулатор медицина ярдәме һәм оториноларингология, офтальмология, эндокринология һәм хирургия буенча махсус медицина ярдәме алырга мөмкинлек бирәчәк.

Татарстан Премьер-министры яңа җиһазларны үзендә сынап карады. Күзен тикшереп, Илдар Халиков участок терапевты кабинетында урнаштырылган зур булмаган аппарат ярдәмендә, үзенең пульсын һәм үпкәләре торышын белде.

ТР Хөкүмәте башлыгы участок табибы белән пациент арасындагы туры элемтәнең мөһимлеген ассызыклады. Ул һәрбер кешедә үз табибының телефоны булсын өчен системаны тагын да камилләштерергә-визиткалар эшләргә тәкъдим итте.
Бу хакта Түбән Кама муниципаль районының рәсми сайтында хәбәр ителгән.