Татарстан Республикасы Премьер-министры Рөстәм Миңнеханов "Кадрлар резервы" проекты финалистлары белән очрашты

Татарстан Республикасы Премьер-министры Рөстәм Миңнеханов кичә, 2нче март көнне, сәләтле яшьләрне ачыклау һәм аларга ярдәм күрсәтү буенча "Кадрлар резервы" проекты финалистлары белән очрашты. Очрашу ТР Хөкүмәт Йортында узды. Чарага "Кадрлар резервы" проектының 19 финалисты чакырулы иде.

Татарстан Хөкүмәте исеменнән Рөстәм Миңнеханов һәр "резервист"ка ноутбук бүләк итте.

ТР яшьләр эшләре, спорт һәм туризм министры Марат Барыев хәбәр иткәнчә, "Кадрлар резервы" проектының сайлап алу этабында республиканың барлык районнарыннан да 15-30 яшьтәге 7 меңнән артык яшь кеше катнашты. Беренче этапка 123 кеше узды: мәктәп укучылары, студентлар, яшьләр иҗтимагый оешмалары һәм студент берләшмәләре активистлары.

2009 елның гыйнварыннан проектта катнашучылар 7 этап аша узды. Алар читтән торып та, Казанга килеп тә укыдылар. Этапларның һәрберсендә идарә итү, социаль проектлау, психология, сәясәт белеме, чит телләрне өйрәнү өлкәләре буенча теория һәм практика дәресләре бирелде, мастер-класслар үткәрелде, яшьләрнең социаль яктан мөһим булган проектлары якланды. Конкурс, имтиханнар, тестлар нәтиҗәсендә финалга 19 кеше чыкты. Аларның идарә итү һәм гражданлык потенциаллары башкаларныкыннан көчлерәк булып чыкты. Марат Барыев "Кадрлар резервы" проектында катнашучылар 100дән артык социаль яктан мөһим булган проект ашырганын билгеләп үтте. Әлеге проектлар республиканың мәктәп, югары уку йортлары һәм муниципаль берәмлекләрендә тормышка ашырылды. Марат Барыев фикеренчә, бу кешеләрнең потенциалы киләчәк муниципаль сайлаулар вакытында бик тә кирәк булачак.

Проектның соңгы өлешендә 19 финалист Татарстан Республикасы башкарма хакимияте органнарында практика узачак. Приоритетларны билгеләгәннән соң, финалистлар практика узачак сигез министрлыкны үзләре сайлады.

Рөстәм Миңнеханов фикеренчә, әлеге министрлыклар башлыклары "резервист"ларга техник биремне шәхси рәвештә бирергә тиеш. ТР Премьер-министры катнашучыларның икесен республика Хөкүмәте аппаратында практика узарга чакырды.

Рөстәм Миңнеханов шулай ук "резервист"лардан Татарстан министрлыклары эшен реформалаштыру буенча конкрет тәкъдимнәр көткәнен дә билгеләп үтте.

"Эшкә яңа кеше килгәч, ул бөтен нәрсәгә башкача карый. Яңа кеше эшкә һичшиксез яңалык алып килергә тиеш, - дип мөрәҗәгать итте проект финалистларына Рөстәм Миңнеханов. - Сезнең фикерегез безнең өчен мөһим".

Очрашу барышында "Кадрлар резервы" проекты финалистлары Рөстәм Миңнехановка берничә тәкъдим белән дә чыкты. Алар мәгариф системасын реформалаштыру, "Авыл яшьләре" проектын тормышка ашыру, яшьләр сәясәтенә кагыла.

Рөстәм Миңнеханов югары мәктәп дәрәҗәсен күтәрү буенча җитди эш башкарылырга тиеш дигән фикер җиткерде. Ләкин аның фикеренчә, моны фәкать квалификацияле педагоглар булганда гына башкарырга мөмкин.