Юл чишелеше төзелеше белән бәйле газ үткәрү торбаларын сүтү нәтиҗәсендә Казанның өч районында газ бетәчәк

Татарстан башкаласында газ бетәчәк. Бу Казанның Ямашев проспекты һәм Декабристлар урамы киселешендә юл чишелешенең төзелеше белән бәйле.

Әлеге темага Татарстан Республикасы Хөкүмәт Йортында узган киңәшмәдә сөйләштеләр. Киңәшмәне ТР Премьер-министры вазифаларын башкаручы Равил Моратов үткәрде.

Киңәшмәдә шәһәрнең газ хезмәтләре вәкилләре, ТР гражданлык оборонасы һәм гадәттән тыш хәлләр буенча эшләр министрлыгы вәкилләре, Казан шәһәре районнары хакимият башлыклары катнашты.

Равил Моратов хәбәр итүенчә, 48 мең фатир, шәхси сектордагы 738 йорт, 10 ягулык станциясе, автоном газ системасына тоташтырылган 800 фатир газсыз калачак.

Газ үткәрү торбаларын сүтү эшләре Казанның өч районында: Мәскәү, Киров һәм Яңа-Савин районнарында яшәүче халыкка йогынты ясаячак (барлыгы 150 меңнән артык кеше).

Эшләр 19нчы апрельдә иртәнге сәгать 6да башланыр дип көтелә.

Газ хезмәтләре вәкилләре белдерүенчә, 19нчы апрель көнне өйдә газ булса да, бу әле газ бетмәгән дигән сүз түгел. Шуңа күрә, өйдән чыгып киткәндә, барлык газ краннарын да сүндереп китәргә кирәк.

Газ үткәрү торбаларын сүтү һәм яңадан тоташтыру эшләре күп дигәндә тәүлек ярым дәвам итәчәк. Шуңа күрә халык кайбер йортларда газның 24нче апрельгә кадәр булмаячагына әзер булып торырга тиеш.

План буенча ягулык станцияләре беренче чиратта Казанның Киров районында эшли башлаячак. Соңрак газ шәхси секторга биреләчәк.

Газның бетүе турында мәгълүматны халыкка җиткерү эшен идарә итүче компанияләр, йортлар буенча өлкәннәр башкарачак. Йорт подъездларында игъланнар эленәчәк.