Рөстәм Миңнеханов һәм Герман Греф Россия Саклык банкының Татарстан бүлекчәсе коллективына яңа идарәчене тәкъдим иттеләр

Бүген Россия Саклык банкының "Татарстан банкы" бүлекчәсе коллективына яңа идарәче тәкъдим ителде. Ул - 36-яшьлек Рушан Сәхбиев. Моңа кадәр ул Россия Саклык банкының Көнбатыш Себер банкы идарә рәисе урынбасары булып эшләде. Быел үзенең 75-яшьлеген билгеләп үтүче һәм банкны 1988 елдан бирле җитәкләгән Геннадий Захаров лаеклы ялга китте.

Яңа идарәчене Татарстан Президенты Рөстәм Миңнеханов, Россия Федерациясе Саклык банкы президенты һәм банкның идарә рәисе Герман Греф тәкъдим иттеләр.

Тантанада шулай ук Геннадий Захаров та катнашты. Аңа Россия Саклык банкының Татарстандагы бүлекчәсе башлыгы киңәшчесе булырга тәкъдим ителде.

"Татарстан туплаган тәҗрибәне берничек тә югалтырга ярамый", - диде Герман Греф һәм Геннадий Захаровка Россия Саклык банкы җитәкчелеге исеменнән мактаулы грамота тапшырды.

Үзенең чыгышында Геннадий Захаров 20 ел эчендә җитештерү базасын оештыру буенча күп эш башкарылганын билгеләп үтте.  Ул банкның элеккеге башлыгы Герман Грефка хезмәтен югары бәяләве өчен рәхмәтен җиткерде.

Яңа идарәче турында сөйләгәндә, Герман Греф Рушан Сәхбиевнең элеккеге эш урынында үзен яхшы яктан күрсәткәнен билгеләп үтте. Шуңа күрә аңа Россия Саклык банкының "Татарстан банкы" бүлекчәсен җитәкләргә тәкъдим ителде.

Үз чиратында, Татарстан Президенты Рөстәм Миңнеханов, яңа идарәчегә мөрәҗәгать итеп, шуны ассызыклады: "Сезнең җитди һәм әзер коллективка кереп китә алуыгызда шигебез юк. Сезгә безнең банкның алдынгылар сафында булуын һәм илдә әйдәп баручы позицияләрне саклавын телим".

Россия Саклык банкының "Татарстан банкы" бүлекчәсе коллективына мөрәҗәгать итеп, Герман Греф һәрбер хезмәткәрне үзенең эш вазифаларына җаваплы итеп карарга, һәрдаим камилләшергә һәм ирешелгән үрләрдә туктап калмаска чакырды.