Равил Моратов: “Яшьләрнең уңышында ветераннарның өлеше зур”

ТР Премьер-министры вазифаларын башкаручы Равил Моратов Татарстан Республикасы җитәкчелеге исеменнән бүген “Казан” милли-мәдәни үзәгендә узган Республика Сугыш һәм хәрби хезмәт ветераннары (инвалидлары) комитеты пленумында катнашучыларны һәм кунакларны сәламләде.

Үз чыгышында ул Татарстанда 2005 елның 1 мартына кадәр исәпкә баскан барлык ветераннар да 2010 елның 1 маена кадәр торак белән тәэмин ителәчәге хакында белдерде. Ул шулай ук соңрак исәпкә баскан ветераннарның икенче категориясе ел ахырына кадәр фатир алачагын искәртте. Равил Моратовның сүзләренә караганда, хәзерге вакытта әлеге исемлектә 7252 кеше бар. “Сугыш ветераннарын торак белән тәэмин итү мәсьәләсе бик тә мөһим. Без берәү дә игътибарсыз калмасын өчен муниципаль берәмлек органнары белән көндәлек эш алып барабыз”, - дип ассызыклады ул.

Равил Моратов республика алдында торган бурычларны хәл итүдә актив катнашканнары, Татарстанны үстерүгә керткән өлешләре өчен сугыш һәм хәрби хезмәт ветераннарына рәхмәт белдерде. Равил Моратовның сүзләренә караганда, алар балалар һәм яшьләрне патриотик рухта тәрбияләүгә гаять зур өлеш кертә. “Яшь буынны тәрбияләүгә зур игътибар биргәнегез өчен без сезгә бик тә рәхмәтле”, - дип ассызыклады ТР Премьер-министры вазифаларын башкаручы Равил Моратов.

Равил Моратов хәбәр иткәнчә, сугыш ветераннарының барысына да “Казаннан Берлингача” дигән документаль фильмның күчермәсе бүләк ителәчәк. Моннан тыш, әлеге фильм балалар аның белән таныша алсын өчен республиканың барлык мәктәпләренә таратылачак.

Яшьләрне әхлакый һәм хәрби-патриотик рухта тәрбияләү мәсьәләләре хакында сөйләгәндә, Равил Моратов Татарстанда әлеге мәсьәләләргә җитди игътибар бирелүен һәм шактый акча бүленүен ассызыклады. Шул ук вакытта ул әлеге юнәлештә эш хәрби хезмәт ветераннарының актив катнашында оешкан төстә алып барылуын билгеләп үтте.

Үз чыгышының ахырында ТР Премьер-министры вазифаларын башкаручы Равил Моратов сугыш ветераннарына Бөек Ватан сугышында Җиңүнең 65-еллыгын лаеклы төстә каршылауларын теләде.

Утырышта Равил Моратов Республика сугыш һәм хәрби хезмәт ветераннары (инвалидлары) комитетына компьютер һәм истәлекле бүләкләр тапшырды.