Владимир Путин Казанда Универсиаданың 7 яңа объектын ачты

Бүген Казанда Россия Премьер-министры Владимир Путин 2013 елгы Универсиаданың 7 яңа спорт объекты ачылу турында белдерде. Хөкүмәт җитәкчесе «Ватан», «Триумф», «Бустан», «Акчарлак», «Төзүче», «Мәскәү» һәм «Мирас» спорт комплексларын ачты.

Спорт корылмалары “дистанцион” режимда ачылды. Сәхнә янында урнаштырылган 7 зур экран ярдәмендә турыдан–туры элемтәгә чиратлап һәр спорт объектын чыгардылар. Универсиада волонтерлары спорт колрылмаларынң әзер булуын белдерде, аннары Татарстан Президенты Рөстәм Миңнеханов Владимир Путинга объектларны ачарга команда бирүен сорап мөрәҗәгать итте. “2013 елда Казандагы XXVII җәйге Универсиаданың 7 спорт объектын ачык дип игълан итәм”, – диде Россия Премьер–министры.

Универсаль «Ватан» һәм «Триумф» спорт комплекслары 2013 елгы Универсиада кысаларында баскетбол буенча күнегүләр алып бару өчен билгеләнгән, анда бассейн (25х11 м), балалар бассейны (10х6 м), спорт зал (42х24 м), тренажер залы (12х12 м) һәм аэробика залы (12х12 м) бар. Комплекста спорт белән шөгыльләнү мәйданы, шулай ук медицина кабинеты, спортчылар бүлмәләре, медицина хезмәте күрсәтү, тренерлар составы, хезмәт күрсәтү персоналы, буфет, административ һәм инженер–техник персонал бүлмәләре дә бар.

«Ватан» Татарстан башкаласының Яңа Савин районында Чуйков һәм Бондаренко урамнары арасында урнашкан, объект территорисендә 351 җиңел автомобиль һәм 10 автобус кую урыннары каралган. «Триумф» комплексы Казанның Авиатөзелеш районында О.Кошевой, Побежимов һәм Годовиков урамнары чатында урнашкан, биредә шулай ук 256 җиңел автомобиль һәм 8 автобус өчен автостоянка каралган.

«Акчарлак» ябык йөзү бассейны Казанның Идел буе районында Кол Гали урамында урнашкан, ул Спортның су төрләре ассоциациясе таләпләренә җавап бирә, 2013 елгы Бөтендөнья спорт уеннары кысаларында йөзү буенча күнегүләр алып бару өчен кулланылачак. 500 кешегә исәпләнгән «Акчарлак» бассейны инвалидлар өчен дә җайлаштырылган.

Казан дәүләт архитектура–төзелеш академиясенең «Төзүче» спорт комплексында 2013 елгы Универсиада кысаларында волейбол уйнаучылар шөгыльләнәчәк, биредә спорт залы, тренажер залы, көрәш залы, аэробика залы һәм авыр атлетика залы бар, шулай ук 157гә якын җанатар кабул итә ала. Спорт комплексы Зеленая урамында урнашкан һәм кирәкле инфрастурктура белән тәэмин ителгән.

Казан дәүләт технология университетының «Мирас» спорт комплексы Җ.Фәйзи урамында урнашкан. Аның 62х34 зурлыкта спорт залы бар, берьюлы 1000гә якын тамашачы кабул итә ала, шул ук вакытта физик мөмкинлекләре чикләнүчеләрне дә. Универсиада кысаларында баскетбол буенча ярыш мәйданнары буларак файдаланылачак. «Мирас» спорт комплексында судьялар бүлмәсе, 50 кешелек матбугат үзәге, спорт федерацияләренең рәсми вәкилләре офислары, интернет-кафе бар.

Казан дәүләт университетының «Бустан» спорт комплекы «Мирас» спорт комлпексы кебек уңайлылыкларга ия. Кулагин урамында урнашкан бу объект волейбол ярышлары үткәрү өчен файдаланылачак. Комплекс проектында буфетлар, матбугат конференцияләре үткәрү өчен кабинетлар һәм административ биналар каралган.

Татар дәүләт гуманитар-педагогика университетының «Мәскәү» спорт комплексы Мәскәү урамында урнашкан. Биредә дә волейбол буенча күнегүләр узачак. Комплекс берьюлы 700 тамашачыны кабул итә ала, 42х27 м зурлыкта спорт залы, тренажер залы (120 кв.м), көрәш залы (294 кв.м), аэробика залы (146 кв.м) һәм авыр атлетика залы (215 кв.м) бар, шулай ук кирәкле инфраструктура белән тәэмин ителгән.