ТР Хөкүмәте һәм Олимпия уеннары Транспорт дирекциясе беркетмәгә кул куйды

Бүген Татарстан Республикасы Хөкүмәт йортында Татарстан Республикасы Хөкүмәте белән “Олимпия уеннары транспорт дирекциясе” Автоном коммерцияле булмаган оешма арасында 2013 елда Казанда 27 нче Бөтендөнья җәйге универсиадага әзерлек һәм үткәрү чорында хезмәттәшлек итү буенча килешү төзү ниятләре турындагы беркетмәгә кул куелды.

Документны ТР Премьер-министры Илдар Халиков һәм “Олимпия уеннары Транспорт дирекциясе” АКО генераль директорының беренче урынбасары Сергей Быстров имзалады.

Документ Илдар Халиков белән Сергей Быстровның очрашуы кысаларында имзаланды. Очрашуда ТР транспорт һәм юл хуҗалыгы министры Ленар Сафин, ТР төзелеш, архитектура, торак-коммуналь хуҗалык министры урынбасары - «Татинвестгражданпроект» ДУП генераль директоры Ирек Фәйзуллин, ТР яшьләр эшләре, спорт һәм туристлык министры урынбасары Хәлил Шәйхетдинов һ.б. катнашты.

Яклар 2013 елда Казанда 27 нче Бөтендөнья җәйге универсиадага әзерлек һәм үткәрү чорында хезмәттәшлек итү һәм транспорт инфрастуруктурасын үстерү мәсьәләләре буенча фикерләште. Аерым алганда, 2010 елның 5 маенда Россия Хөкүмәте Рәисе Владимир Путин Казанга визиты вакытында 2013 елгы Универсиада 2014 елда Сочида Олимпия уеннары үткәрү алдыннан генераль репетиция булачак дип белдерде. Бу хакта ТР Премьер-министры Илдар Халиков искәртте.

Сергей Быстров 2013 елгы Универсиадага әзерлек һәм үткәрү вакытында җыйган тәҗрибәне Сочида узачак Олимпия уеннары мәйданында файдалану нияте булуын белдерде. Ул шулай ук Казанда “Олимпия уеннары транспорт дирекциясе” Автоном коммерцияле булмаган оешманың филиалы ачылачак, дип белдерде. Филиал җитәкчесе кандидатурасы раслана.