Татарстан Президенты “ТАНЕКО” ААҖ мәйданында киңәшмә уздырды

Түбән Камада кичә кич Татарстан Президенты Рөстәм Миңнеханов “ТАНЕКО” заводларының Нефть эшкәртү һәм нефть химиясе комплексы төзелеше буенча киңәшмә уздырды. Шулай ук Президент объектларны да карады.

“ТАНЕКО” ААҖ матбугат хезмәте белдерүенчә, киңәшмәдә Рөстәм Миңнеханов проектны гамәлгә куючылар алдында торган ике төп бурычны билгеләгән. Беренчесе, ике айда төзелеш-монтажлау эшләренең төп өлешен тәмамлау. Моның өчен үз вакытында җиһазлар һәм материаллар белән тәэмин итәргә, эшне сыйфатлы башкарырга, кеше ресусрсларын мобилизацияләргә, башкару-техник документларны рәсмиләштерүне тәмамларга кирәк.

Булачак производствоны квалификацияле кадрлар белән тәэмин итү икенче мөһим бурыч булып тора. Беренче пуск комплексынада персоналга ихтыяҗ 1647 кеше тәшкил итә. Бүгенге көндә750дән артык хезмәткәр кабул ителгән. Бигрәк тә эшче һәнәр ияләренә ихтыяҗ зур.

Мондый катлаулы һәм югары технологияле производство тәҗрибәле белгечләр һәм эшче персонал таләп итә, дип билгеләп үтте Рөстәм Миңнеханов. Моның белән бәйле рәвештә ул «ТАИФ-НК» ААҖ, «Түбән Кама Нефтехим» ААҖ, «Түбән Кама шин» ААҖ җитәкчеләренә һәм башкаларга «ТАНЕКО»га кадрлар мәсьәләсен хәл итү һәм шундый ук производстволарда стажировка үтүне оештыруда ярдәм итүләрен сорап мөрәҗәгать итте.

“Беркайда да артык кешеләр булмавын аңлыйм, - диде Президент, - шулай да Комплекс бөтенроссия күләмендәге объект икәнен исәпкә алырга кирәк. Персоналлар туплау мәсьәләсенә җитди карарга кирәк”.

Гомумән алганда, проектны гамәлгә кую барышы расланган график кысаларында бара, дип белдерде Рөстәм Миңнеханов. Бүген моның өчен кирәкле шартлар бар. Аерым алганда, җитештерү күләмен һәм хезмәт сыйфатын күтәрү өчен матди стимуллаштыру системасы җитди фактор булып тора.

Киңәшмәдә ТР Куркынычсызлык советы секретаре Валерий Власов, ТР Премьер-министры урынбасары – энергетика министры Илшат Фәрдиев, «Татнефть» компаниясе генераль директоры Шәфәгать Тәхаутдинов, Түбән Кама муниципаль районы башлыгы Айдар Метшин, «ТАНЕКО» ААҖ генераль директоры Хәмзә Баһманов, шулай ук подрядчы оешмаларның җитәкчеләре катнашты.