Казанда туристлар өчен атналык фольклор тамашасын башлап җибәрәчәкләр

Казанда “Туган авылым” милли комплекс мәйданчыгында туристлар өчен махсус атналык театральләштерелгән Kazan фольклор тамашасы башланачак. Проект ТРның Туризм буенча Дәүләт комитеты ярдәме белән гамәлгә ашырыла. Бу хакта бүген ТР Министрлар Кабинетында узган брифингта ТРның Туризм буенча Дәүләт комитеты рәисе урынбасары Екатерина Барабанова хәбәр итте. “Бу уникаль программа. Россия шәһәрләрендә мондый даими программалар бик аз. Туристлар бу программага эләгеп, Татарстан белән таныша алалар”, - дип аңлатты ул. Аның сүзләренчә, кичке аш вакытында туристлар милли татар ашлары белән таныша  һәм татар халкының тарихы һәм мәдәни хәзинәләре турында матур программа карый алалар. Фольклор тамашасы 1 майда башланачак һәм 1 октябрьгә кадәр дәвам итәчәк. Программаны һәр шимбә көнне ике тапкыр – 18.00 һәм 20.30да күрсәтәчәкләр. Шулай ук бу программа өстәмә рәвештә бәйрәм вакытында – 2 һәм 7 майда эшләячәк.