Россия Президенты Дмитрий Медведев Түбән Камадагы нефть эшкәртү һәм нефтехимия заводлары Комплексында булды

Бүген Россия Федерациясе Президенты Дмитрий Медведев Түбән Камада “ТАНЕКО” нефть эшкәртү һәм нефть химиясе заводлары комплексында булды.

Россия башлыгы Татарстан Президенты Рөстәм Миңнеханов, РФ Хөкүмәте Рәисе урынбасары Игорь Сечин, Дәүләт Думасы Рәисенең беренче урынбасары Олег Морозов, федераль органнар җитәкчеләре, “Татнефть” ААҖ генераль директоры Шәфәгать Тәхаутдинов озатуында үзәк операторлар комплексында булды. Биредә ул “ТАНЕКО” хезмәткәрләре белән аралашты.

“ТАНЕКО” ААҖ генераль директоры Хәмзә Баһманов Президентка кыскача проектны гамәлгә ашыру барышы турында сөйләде. “ТАНЕКО”ның төп хезмәтләре һәм бүлекчәләре җитәкчеләренең җибәрү-көйләү эшләрен башлауга әзерлек турындагы докладлары тыңланылды.

Аннары Дмитрий Медведев компьютерның тиешле төймәсенә басып, җибәрү-көйләү режимында нефтьне беренче эшкәртү эшен башларга команда бирде. “Транснефть” системасыннан комплексның резервуар паркына нефть суыртып агызу турында хәбәр килде. Шуннан РФ Президенты операторлар комплексындагыларга мөрәҗәгать итеп: “Сезне җибәрү-көйләү режимында эш башлану белән котлыйм. Аңлашыла ки, әле барысы да алда. Киләчәктә дә бергә эшләячәгегезгә, төзелеш һәм төзелеш-монтажлау эшләрен югары сыйфатлы итәчәгегезгә ышанам. Ә нәтиҗәләр республика тормышында һәм гомумән безнең дәүләт потенциалында чагылачак.

“ТАНЕКО”ның беренче чираты елына 7 миллион тонна күкертле нефть эшкәртүгә исәпләнгән. “Татнефть” ААҖ аны булдыруга 170 миллиард сум юнәлдергән. Проектны РФ Инвестицион фонд та 16,5 миллиард сум күләмендә финанслаган. Бу акчалар тышкы инфраструктурага сарыф ителгән. Хәзер “ТАНЕКО”ның шундый ук егәрлектәге икенче чиратын төзү мәсьәләсе карала.

Бер үк вакытта гидокрекин җайланмасын булдыру буенча эшләр бара, ул нефть эшкәртү тирәнлеген арттырырга мөмкинлек бирәчәк. Аны 2013 елның башында эшләтеп җибәрү һәм Евро-5 стандартында 1,5 миллион тонна дизель ягулыгы һәм 450 мең тонна авиакеросин җитештерү планлаштырыла.

Гомумән, комплекс проектында бер-берсе белән бәйле объектларны этаплап төзү каралган: башта елына 7 миллион тонна, аннары 14 миллион тонна чимал җитештерә торган нефть эшкәртү заводы, нефтьне тирәнтен эшкәртү заводы һәм нефть химиясе заводы. Чималны эшкәртү тирәнлеге 97 процент каралган. Биредә Евро-5 стандарты таләпләренә җавап бирә торган нефтьтән 18 төрле продукция чыгару каралган.

“Татнефть” комплекс төзелеше башланган көннән үк башлап берьюлы социаль мәсьәләләрне дә хәл итә. Гомуми мәйданы 135 мең квадрат метр булган 16 йорт, балалар бакчасы, шифаханә-профилактория төзелгән.