Рөстәм Миңнеханов: “Татарстан – ул Россиягә көнбатыш капиталы инвестицияләре кертү өчен яхшы мәйданчык”

“Татарстанның төп бурычы – республикага күпсанлы чит ил инвесторларын җәлеп итү”, - дип белдерде Рөстәм Миңнеханов «Майкрософт» компаниясе кампусында АКШ Кремний үзәне төбәге инвестиция һәм венчур компанияләре вәкилләренә мөрәҗәгать итеп.
Татарстан – ул Россиягә көнбатыш капиталы “инвестицияләре кертү өчен яхшы мәйданчык”, дип билгеләп үтте республика башлыгы Татарстанны тәкъдим итү вакытында. Рөстәм Миңнеханов безнең республиканың уңай якларын санаганда уңайлы географик урнашу, сәнәгать, фән һәм технологик потенциал, шулай ук яхшы мәгариф системасы атады. Моннан тыш, ТР Президенты Америка эшмәкәрләре игътибарын Россиядә иң зур IT-паркка, бизнес–инкубаторларга һәм “Алабуга” махсус икътисади зонасына юнәлтте. “Россия һәм чит ил инвесторларының безгә килүен телибез”, – диде ул. Шулай ук Р.Миңнеханов Кремний үзәне бизнес-элитасы игътибарын 2006 елда Татарстанның РФ төбәкләре арасында беренче булып “Майкрософт” компаниясе белән лицензияләнгән килешү имзалавын искәртте.
Кремний үзәне төбәгендә мәгариф һәм шәхси эшмәкәрлек бергә бәйләнгән. ТР Президенты бизнесменнарга Татарстан җитәкчелеге мәгарифкә аеруча игътибар бирә дип сөйләде. Президент сүзләренчә, икенче ел вузларны җиһазлау программасы гамәлгә ашырыла, грантлар мехнизмы файдаланыла. “Таләп ителә торган лидерлык сыйфаты ачылсын өчен бизнеска яшьләрне җәлеп итәргә кирәк”, - дип ассызыклады Рөстәм Миңнеханов. Шулай ук республикада мәктәптә белем бирү системасын камилләштерү буенча эшләр алып барыла.
Аннары Татарстан Республикасы Президенты кояш батареяларының яңа төрен чыгаруда махсуслашучы “Солиндра” компаниясе эшчәнлеге белән танышты. Кояш батареялары бары тик коммерция биналары түбәләрендә генә урнаштырылачак, дип билгеләп үтте компаниянең башкаручы директоры Крис Гронет.
Татарстан башлыгы АКШка визитының беренче көнен “Плаг энд плей техцентр” бизнес–инкубаторында тәмамлады, анда мактаулы кунаклар стенасында истәлекле язу калдырды.