ТР Президенты Волгоград өлкәсе губернаторы белән очрашты

Бүген Казан Кремлендә Татарстан Президенты Рөстәм Миңнеханов белән Волгоград өлкәсе губернаторы Анатолий Бровко очрашты. Искәртеп үтәбез, бүген республикага ике көнлек эшлекле визит белән Волгоград өлкәсе делегациясе килде.

Очрашуда Рөстәм Миңнеханов кунакларны җылы сәламләде һәм республикага ясаган визитлары өчен рәхмәт белдерде.

“Россия төбәкләре үзара элемтәдә торуы, тәҗрибә уртаклашуы мөһим”, - диде Татарстан башлыгы очрашуда һәм төбәкләр арасындагы якын элемтәләр уртак проблемаларны хәл итәргә ярдәм итә, дип өстәде.

Рөстәм Миңнеханов Татарстан Республикасы һәм Волгоград өлкәсе мөнәсәбәтләре турында сөйләгәндә, киләчәктә икътисад өлкәсендә генә түгел, ә башка өлкәләрдә дә хезмәттәшлек итүнең перспективалы юнәлешләре бар, дип белдерде.

“Без хезмәттәшлек итә алырлык юнәлешләрне җентекләп карарга кирәк. Алар күп дип уйлыйм”, - диде Рөстәм Миңнеханов.

Энергия саклау технологияләре, «Татспиртпром» ААҖ продукциясе һәм Татарстан Республикасы дарулары һәм медицина эшләнмәләре белән тәэмин итүне һ.б. перспективалы юнәлешләргә кертеп була.

Бүген республика башлыгы очрашуда Сталинград сугышын искә тошерде. “Волгоград – ул безнең ил тарихы”, - диде Рөстәм Миңнеханов.

Сталинград сугышында Татарстанның укчылар дивизиясе катнашкан, 40 татарстанлы Советлар Союзы Герое исеменә лаек булган, 19ы – Дан ордены иясе дип белдерде ул. ТР Президенты Татарстанда Бөек Ватан сугышы ветераннарына ярдәм итү өчен күп көч куела, дип ассызыклады.

Очрашудан соң Рөстәм Миңнеханов белән Анатолий Бровко журналистларның сорауларына җавап бирде. Республика Президенты очрашуда кадрлар әзерләү хакында сүз барды дип сөйләде. Яклар мәгариф, сәламәтлек саклау өлкәләрендәге мәсьәләләрне хәл итү юллары һ.б. буенча фикерләшкән.

Волгоград өлкәсе губернаторы республика җитәкчелегенә җылы каршы алганнары һәм делегациянең кызыклы программасы өчен рәхмәт белдерде. Ул төбәкләр арасында тәҗрибә уртаклашу Татарстанның һәм Волгоград өлкәсенең нәтиҗәле үсешенә йогынты ясаячагына ышаныч белдерде.

“Татарстанда IT-тармагы үсеше сокландыра”, - диде А.Бровко. “Без фармакология кластерын формалаштырырга ниятлибез”, - дип дәвам итте губернатор. Волгоград өлкәсендә патриотик тәрбия бирү мәсьәләсенә җитди игътибар бирелә, дип белдерде ул. ТР белән Волгоград өлкәсе арасындагы килешү кысаларында укучыларга Мамай Курганга экскурсия оештыру хакында сөйләшербез. Җиңүчеләр буыны булырлык яшьләрне тәрбияләсәк иде, ветераннарның үз тәҗрибәләрен, илгә мөнәсәбәтләрен, тарихка хөрмәтләрен яшьләр белән уртаклашуы әһәмияткә ия”, - дип ассызыклады Волгоград өлкәсе губернаторы.

А.Бровко журналистларның сорауларына җавап биргәндә, Идел елгасының саегу проблемасы федераль дәрәҗәгә күтәрелде диде. Бу уңайдан РФ Президенты күрсәтмәсе буенча киңәшмә узыдырылды. “Җитди комплекслы программа эшли башладылар, ул федераль дәрәҗәдә булачак, анда Идел буеның бөтен төбәкләре керәчәк”, - диде ул.