Мәскәүдә Медиаклубның беренче очрашуы узды

Бүген Татарстан Республикасының Россия Федерациясендәге Тулы вәкаләтле вәкиллегендә Медиаклубның беренче очрашуы узды. Анда Татарстаннан чыккан һәм республика белән актив хезмәттәшлек итүче 60 тан артык журналист катнашты.

Бу иҗтимагый оешманы булдыруның максаты – икътисадны һәм инвестицияләрне, мәдәниятне һәм телне үстерүдә бөтен яклап ярдәм итәргә омтылу белән бәйле. Клуб гаммәви мәгълүмат чараларының 100дән артык вәкилен берләштерә.

Беренче очрашуда Матбугат һәм массакүләм коммуникацияләр буенча республика агентлыгы җитәкчелеге, федераль һәм Мәскәү гаммәви мәгълүмат чаралары, “Яңа гасыр” телерадиокомпаниясе вәкилләре катнашты. “Татар–информ” мәглүмат агентлыгы телестудиясендә Татарстан журналистлары белен телекүпер оештырылды.

Татарстан Республикасының Россия Федерациясендәге Тулы вәкаләтле вәкиле Равил Әхмәтшин утырышта катнашучыларны сәламләде. Аннары Матбугат һәм массакүләм коммуникацияләр буенча республика агентлыгы җитәкчесенең беренче урынбасары Фәрит Шаһиәхмәтов республика агентлыгының, “Татамедиа” ААҖ нең, гомумән алганда, Татарстан Республикасы медиа киңлеге турында сөйләде. Аерым алганда, ул ТР да федераль гаммәви мәгълүмат чаралары белән элемтә җайга салынган дип билгеләп үтте.

Бүгенге очрашу кысаларында республиканың әйдәп баручы гаммәви мәгълүмат чаралары җитәкчеләре – “ЯГТ” телерадиокомпаниясе, “Татар-информ” мәгълүмат агентлыгы, “Татарстан” журналы үз ГМЧ ын тәкъдим итте. Хөкүмәт порталы мөмкинлекләре хакында ТР Президенты матбугат хезмәте җитәкчесе Андрей Кузьмин сөйләде.

“Татар-информ”ны мәгълүмат агентлыгы генераль директоры Леонид Толчинский тәкъдим итте. Ул бүген агентлык рус телендә 250гә кадәр хәбәр (шул исәптә 200 е Татарстан тормышына кагыла), 40 якын үзенчәлекле (рус телендәге хәбәрне кабатламый) һәм инглиз телендә 25–30 хәбәр җитештерә, диде. “Татар-информ” чит ил татарлары өчен латиницада хәбәрләр тасмасы тәкъдим итүче бердәнбер агентлык. Бүгенге көндә агентлыкның бер тәүлектәге аудиториясе (барлык сервисларны да исәпкә алып) 40 мең кулланучыдан артып китә. Аларның 70 проценты респубикадан читтә яши.

“Татар-информ” мәгълүмат агентлыгы гомумдөнья тенденцияләре кысаларында мультимедиа журналистика моделен кертү максатыннан яңа сервислар ача”, - дип ассызыклады Леонид Толчинский. Материалларның дүрттән бер өлеше видео һәм фото рәвешендә дә бирелә. Барлык материалар да укучылар фикер алышуы өчен ачык режимда. Көн саен материалларга 200 гә якын шәрехләмә бирелә.

“Татар-информ”ның Россия һәм чит ил буенча рус телендә хәбәрләр әзерләүче 26 үзхәбәрчесе һәм татарлар күпләп яши торган төбәкләрдә татар телендә эшләүче 8 үзхәбәрчесе бар.

“Татар-информ” мәгълүмат агентлыгы тәкъдим итү вакытында хезмәттәшләренә тәкъдимнәр белән чыкты. Аларның берсе даими рәвештә аналитик бүлектә, шулай ук «Неформат» бүлегендә катнашырга чакыру. Моннан тыш, Медиаклуб әгъзаларына “Татар-информ”ның махсус проектларында катнашырга тәкъдим ителде.

Медиаклубның беренче утырышында ТР Президенты Рөстәм Миңнеханов катнашты. Ул журналистларның сөйләшүенә кушылды. Ә гаммәви мәгълүмат чаралары вәкилләре республика башлыгына сораулар бирү мөмкинлеге алды.

Рөстәм Миңнеханов очрашуда катнашучыларны сәламләп, чараны оештыручыларга аралашу мөмкинлеге өчен рәхмәт белдерде. Татарстан Президенты республика потенциалын федераль дәрәҗәдә тәкъдим итү әһәмияткә ия дип саный. Медиаклуб булдыру хезмәттәшләр арасында дустанә мөнәсәбәтләр урнашуга ярдәм итәчәгенә ышана.

Очрашуда Татарстан Президенты танылган юбиляр журналистларга дәүләт бүләкләре тапшырды.

Республика башлыгы яңа IT-технологияләр куллануын билгеләп үтте. Моның белән бәйле рәвештә “Электрон Татарстан” һәм “Электрон документ әйләнеше” проектлары хакында искәртеп узды.

Журналистларның сораулары эшчәнлекнең төрле өлкәләренә кагыла иде. Шулай итеп, ислам илләре белән хезмәттәшлек турындагы сорауга җавап биргәндә, Татарстан ислам финансларын җәлеп итү мәсьәләсен өйрәнә, дип ассызыклады Рөстәм Миңнеханов. Шулай ук журналистлар республика башлыгына шәхси сораулар буенча да мөрәҗәгать итте.

Очрашу ахырында Татарстаннан чыккан журналистлар безнең республика өчен һәрвакыт кадерле булды һәм хәзер дә шулай, дип билгеләп үтте Матбугат һәм массакүләм коммуникацияләр буенча республика агентлыгы җитәкче Марат Моратов. Ул аларга башлангыч эшләрендә ярдәм итәргә вәгъдә итте һәм киләчәктә Медиаклуб әгъзалары – журналистлар белән хезмәттәшлек итү нәтиҗәле булачагына өмет белдерде.

Татарстан Президенты тагын бер тапкыр журналистларны актив хезмәттәшлеккә чакырды, Медиаклубның журналистлар эшчәнлеге һәм федераль дәрәҗәдә республика тормышын яктырту өчен нәтиҗәле мәйданчык булачагына ышаныч белдерде.