Бүген Казан Кремлендә агымдагы елда беренче бүләкләү тантанасы узды

Бүген Казан Кремлендә Президент Рөстәм Миңнеханов ил һәм республика үсешенә лаеклы өлеш кертүче бертөркем хезмәт алдынгысына РФ һәм ТР дәүләт бүләкләрен тапшырды. Кремльнең Ак залына җыелган 50 дән артык бүләкләнүче арасында төрле өлкә вәкилләре – дәүләт эшлеклеләре, хәрбиләр, галимнәр, муниципалитет җитәкчеләре, икътисад һәм сәнәгать өлкәсендә озак еллар хезмәт куючылар, укытучылар, табиблар, идарәчеләр, савымчы һәм терлекчеләр, спортчылар һ.б. бар иде.

Республика башлыгы тантананы “Дакар” халыкара ралли-рейдында инде унынчы тапкыр җиңү яулаган “КАМАЗ-Мастер” командасын котлаудан башлады. Билгеле булганча, шушы көннәрдә тәмамланган “Дакар-2011” марафонында йөк автомобильләре классында 1-4 урыннарның барысын да “КАМАЗ-Мастер” экипажлары яулады. “Бу илебез өчен зур җиңү”, - дип ассызыклады Президент.

Рөстәм Миңнеханов быелгы беренче бүләкләү тантанасында узган ел республиканың социаль-икътисади үсеш күрсәткечләрен дә кыскача бәян итте. “2010 ел катлаулы булды. Аномаль кызу көннәр, янгыннар, икътисади кризис нәтиҗәләрен бетерү... Шуңа да карамастан елны уңышлы тәмамлый алдык”, -дип ассызыклады Президент. Аның белдерүенчә, 2010 елда Татарстан үз позицияләрен торгыза алган. Узган ел сәнәгатьтә җитештерү күләме 1 триллион сумнан арткан. Шулай да әле, Президент сүзләренә караганда, агросәнәгать комплексында хәл катлаулы кала. “Бүген бу тармакта хәлне тотрыклыландыру, беренче чиратта, терлекләрнең баш санын саклап калу буенча барлык чаралар күрелә”, - диде ул.

Президент белдерүенчә, бүген Татарстанны үстерү өчен барлык мөмкинлекләр, тиешле кадрлар бар. Перспективаларга килгәндә, Президент алда торган төп бурыч дип халыкның яшәү дәрәҗәсен күтәрүне атады. Мәгарифне үстерүдә ул яңа стратегиягә зур өметләр баглануын, быел бакчаларга чиратлар көткән балалар проблемасын чишүгә зур игътибар биреләчәген ассызыклады.

Президент залга җыелучыларны югары дәүләт бүләкләренә ия булулары белән котлап, бу бүләкләр соңгысы булмасын, алга таба да республика, ил үсеше өчен лаеклы хезмәт итегез, дигән теләктә калды.

Бүләкләнүчеләрнең үзләренә килгәндә, Казан югары хәрби-команда училищесы җитәкчесе, генерал-майор Валерий Миронченко Президент кулыннан ΙVдәрәҗә “Ватан алдындагы казанышлар өчен” орденын алды. Ә Республика матбугат һәм массакүләм коммуникацияләр агентлыгы җитәкчесе Марат Моратовка, “КАМАЗ-Дизель” ААҖ генераль директоры Юрий Герасимовка, Россиянең спорт мастеры Биләлетдин Бәдретдиновка ΙΙ дәрәҗә “Ватан алдындагы казанышлар өчен” ордены медальләре тапшырылды. Россия фәннәр академиясе киңәшчесе, РФА Казан фәнни үзәге Президиумы әгъзасы Александр Коновалов белән Казан дәүләт мәдәният һәм сәнгать университеты ректоры Рифкать Йосыпов Почет ордены белән бүләкләнде.

ТР Дәүләт Советы рәисе урынбасары Римма Ратниковага “РФ атказанган мәдәният хезмәткәре” исеме бирелүен раслаган таныклык һәм күкрәк билгесе тапшырылды. Шундый ук РФ дәүләт бүләгенә Казан театр училищесы мөгаллиме Рөстәм Фәтхуллин белән Казан дәүләт мәдәният һәм сәнгать университеты доценты Харис Нигъмәтҗанов лаек булды. “Казан компрессорлар заводы” ААҖ баш технологы Ринат Дәүләтбаевка “РФ атказанган машина төзүчесе”, КФУ мәгълүмат технологияләре үзәге директоры Владимир Чугунов белән КФУ кафедра мөдире Сергей Мокичевка “РФ атказанган югары мәктәп хезмәткәре” исемнәре тапшырылды.

Татарстанның югары дәүләт бүләкләрен алучыларга килгәндә, ТР Президенты “КАМАЗ” ААҖ баш конструкторы - фәнни-техник үзәк директоры Данис Вәлиевка “ТР алдындагы казанышлар өчен” орденын тапшырды. “Фидакарь хезмәт өчен” медале белән бүләкләнүчеләр арасында Сәламәтлек саклау һәм социаль үсеш буенча федераль хезмәтнең ТР идарәсе җитәкчесе Рөстәм Сафиуллин, Буа муниципаль районы башлыгы Рафаэль Әбүзәров, РФ нең Ислам конференциясе оешмасындагы Даими вәкиле киңәшчесе Хәйдәр Галиев, ТР Конституция суды рәисе Виктор Демидов, Яшел Үзән районының “Вахитов” терлекчелек комплексы савымчысы Рәсимә Вәлиева һ.б. бар иде. Шулай ук бертөркем хезмәт алдынгысына “ТР халык артисты”, “ТР атказанган фән эшлеклесе”, “ТР атказанган сәнгать эшлеклесе”, “ТР атказанган югары мәктәп хезмәткәре”, “ТР атказанган икътисадчысы”, “ТР атказанган терлекчесе”, “ТР атказанган җиңел сәнәгать хезмәткәре”, “ТР атказанган авыл хуҗалыгы механизаторы”, “ТР атказанган укытучысы”, “ТР атказанган табибы”, “ТР атказанган сәламәтлек саклау хезмәткәре”, “ТР атказанган мәдәният хезмәткәре” исемнәре бирелде.

Барлык бүләкләнүчеләр исеменнән чыгыш ясаган Римма Ратникова , хезмәтләрен югары бәяләгән өчен республика Президентына рәхмәт сүзләрен җиткереп, дәүләт тарафыннан югары бәя алу эшкә яңа дәрт бирә, дип ассызыклады.

Кремльдәге бүгенге тантана күмәкләп фотога төшү белән тәмамланды.