Рөстәм Миңнеханов Татарстанда Укытучы елы нәтиҗәләрен канәгатьләнерлек дип бәяләде

“Укытучы ел узып та китте. Шушы бер ел эчендә никадәр күп эш башкарып була икән”, - дип белдерде бүген ТР Президенты Рөстәм Миңнеханов Татарстанда Укытучы елын ябу тантанасында.

“Бүген монда яңгыраган “Укытучы елы укытучы гасырына күчәргә тиеш” дигән сүзләр белән килешмичә булмый. Мин ел саен без кабул иткән “Киләчәк” программасының нәтиҗәләрен чыгарырга кирәк дип уйлыйм. Чынлыкта бөтен нәрсә мөнәсәбәттән тора: укытучының дәрәҗәсенә мөнәсәбәт тә, мәктәпкә мөнәсәбәт тә керә монда”, - дип саный Президент.

“Хезмәткә тармак системасы буенча түләү, “Электрон мәктәп” программасы – бу эле без сезнең белән тормышка ашырырга тиешле зур эшнең башы гына. Монда төп урынны укытучы алып тора. Әлбәттә, барысын да берьюлы эшләп бетереп булмый”, - диде Рөстәм Миңнеханов.

Аның сүзләренчә, быел исә балалар бакчачаларына нык игътибар биреләчәк. “Ел башына өч яше тулган балаларны без балалар бакчалары беән тәэмин итеп бетерергә тиеш. Бу бик җитди эш һәм зур инвестицияләр таләп итә. Без бурычны да тормышка ашырачакбыз”, - диде ТР Президенты.

“Без алга таба да үзебезнең укытучыга аның абруен күтәрергә ярдәм итәчәкбез. “Алгарыш” кебек белем арттыру программалары, башка проектлар укытучыга хезмәт итәчәк. Мин сезгә хезмәтегез өчен рәхмәт белдерәм. Без, ел саен җыелып, менә шулай итеп нәтиҗә ясаячакбыз”, - диде Р.Миңнеханов.

ТР Президенты республиканың бер төркем укытучыларына РФ Президенты Рәхмәт хатын тапшырды, “Татарстан Республикасының атказанган укытучысы” исеме бирелү белән котлады.

Рөстәм Миңнеханов Татарстанда Укытучы елы нәтиҗәләрен канәгатьләнерлек дип бәяләде. “Мин иганәчеләребезнең, Хөкүмәт һәм муниципаль берәмлекләрнең алга таба да нык итеп балалар, укытучы һәм мәктәп өчен эшләүләрен дәвам итәрләр дип өметләнәм”, - дип сүзен тәмамлады Татарстан Президенты.