Татарстанда IT өлкәдә көчле мәйданчык булдырылган, дип саный РФ финанс министры урынбасары

Бүген Татарстан Республикасы Хөкүмәте йортында дәүләт финанслары белән идарә итүдә мәгълүмати мохит булдыру һәм үстерү концепциясен эшләү мәсьәләләренә багышланган түгәрәк өстәл узды. Түгәрәк өстәл эшендә Татарстан Республикасы Президенты Рөстәм Миңнеханов, Россия Федерациясе финанс министры урынбасары Татьяна Нестеренко, Федераль казначылык җитәкчесе Роман Артюхин, Татарстан Республикасы мәгълүматлаштыру һәм элемтә министры Николай Никифоров, ТР финанс министры Радик Гайзатуллин, ТР Президенты ярдәмчесе Анатолий Краснов, Федераль казначылыкның Татарстан буенча идарәсе җитәкчесе Марат Зарипов, республика министрлыклары һәм ведомстволарының җаваплы хезмәткәрләре катнашты.

Киңәшмәне ачып, Рөстәм Миңнеханов республикада мәгълүмати технологияләрне дәүләт идарәсе процессына кертү өлкәсендә генә түгел, дәүләт идарәсе системасы концепциясен камилләштерү җәһәтеннән дә зур тәҗрибә туплануын билгеләп үтте. Мисал өчен, 2001 елдан алып Татарстанда республиканың һәр министрлыгы һәм ведомствосы буенча идарә итүгә дәүләт заказы формалаштырыла. 131 нче Федераль закон кабул ителгәннән соң җирле үзидарә органнары, ә 2010 елдан башлап, территориаль федераль органнар белән дә шундый мөнәсәбәтләр булдырылды.

Киңәшмә барышында Россия Федерациясе финанс министры урынбасары Татьяна Нестеренко дәүләт (муниципаль) финанслары белән идарә итүдә интеграцияләнгән мохит булдыру һәм үстерүдәге идеология һәм алымнар хакында сөйләде, Татарстан сынау төбәге сыйфатында очраклы рәвештә генә сайлап алынмады, дип ассызыклады. “Биредә IT-технологияләр өлкәсендә көчле мәйданчык булдырылган”, - дип билгеләп үтте Татьяна Нестеренко.

Федераль казначылык җитәкчесе Роман Артюхин түгәрәк өстәлдә катнашучыларга бүгенге көндә Россиядә Федераль казначылыкның мәгълүмати-технологик инфраструктурасы базасында дәүләт идарәсе секторында акча операцияләрен тулысынча колачларга мөмкинлек бирүче дәүләт (муниципаль) финанслар белән идарә итүдә заманча системаның нигезләре формалашуы хакында хәбәр итте. Әмма бүгенге көндә иҗтимагый финанслар өлкәсендә мөнәсәбәтләрне үстерү ачык-хокукый берәмлекләрнең финанс эшчәнлеге турындагы мәгълүматның составы һәм сыйфатына, шулай ук аларның эшчәнлегенең нәтиҗәләре хакындагы мәгълүматның ачыклыгына карата яңа таләпләр куя. Шуңа бәйле рәвештә, шулай ук дәүләт (муниципаль) акчалары белән идарә итүнең сыйфатын арттыру максатыннан, иҗтимагый финанслар белән идарә итүдә бердәм интеграцияләнгән мәгълүмати системаны үстерергә кирәк. “Дәүләт финанслары гомумроссия порталын булдыру әлеге системаны гамәлгә кертүдә соңгы этап булачак, анда реаль вакыт режимында бюджет акчалары белән бәйле барлык финанс операцияләре чагылыш табачак”, - дип белдерде Роман Артюхин.