Татарстан таможнясы бер ел эчендә федераль бюджетны 15 миллиард сумга тулыландырган

Узган ел Татарстан таможнясы хезмәткәрләре федераль бюджетка 15 миллиард 224 миллион сум акча күчергән. Бер ел эчендә тауарларга барлыгы 46549 декларация тутырылган. Бүген ТР Министрлар Кабинетында узган брифингта ведомство җитәкчесе Альберт Мәүликов Татарстан таможнясының узган елдагы эшчәнлек нәтиҗәләре хакында сөйләде.

Ул китергән мәгълүматларга караганда, узган ел барлык декларацияләрнең 100 проценты бер эш көне дәвамында тутырылган. Тышкы икътисади эшчәнлектә намуслы катнашучылар эшчәнлеге өчен уңайлы шартлар булдыру Татарстан таможнясы хезмәткәрләренең өстенлекле эш юнәлеше санала. Моның өчен таможня мәгълүмати технологияләрне үстерә, биредә актив рәвештә тауарларны электрон рәвештә декларацияләү процедурасы кертелә. Әлеге технология тышкы икътисади эшчәнлектә катнашучыларның вакытлы чыгымнарын сизелерлек кыскартырга, субъектив кеше факторын гамәлдән чыгарырга мөмкинлек бирә.

2010 елда барлык декларацияләрнең 70 проценты электрон форматта тапшырылган. Бу Идел буе федераль округы һәм Россиядәге иң югары күрсәткеч. Мәгълүмати технологияләрне актив рәвештә гамәлгә кертү өчен техник җиһазландыруга игътибар бирергә һәм контрольлек итүче башка органнар белән хезмәттәшлек итәргә кирәк, дип ассызыклады А.Мәүликов.