Рөстәм Миңнеханов: “Татарстанның транспорт тармагы алдында зур бурычлар тора”

Татарстан транспорт тармагында киң колачлы проектларны гамәлгә ашыра һәм алга таба да бу эшне дәвам итәргә әзер. Бүген республика Президенты Рөстәм Миңнеханов ТР Транспорт һәм юл хуҗалыгы министрлыгының йомгаклау коллегиясендә әнә шулай дип белдерде. Коллегиядә Россия транспорт министры урынбасары Олег Белозеров, Федераль юл агентлыгы җитәкчесе Анатолий Чабунин, Дәүләт Думасының беренче вице-спикеры Олег Морозов, Дәүләт Думасының төзелеш һәм җир мөнәсәбәтләре комитеты рәисе Мартин Шаккум катнашты.

Транспорт тармагында башкарылган эш нәтиҗәләре хакындагы доклад белән ТР транспорт һәм юл хуҗалыгы министры Ленар Сафин чыгыш ясады. Ул хәбәр иткәнчә, 2010 елда “2006-2010 елларда Татарстан Республикасы транспорт комплексын үстерү” максатчан программасын гамәлгә ашыру төгәлләнгән. Тулаем алганда, 5 ел эчендә программаны гамәлгә ашыруга барлык чыганаклардан 108,94 миллиард сум акча тотылган.

2010 елның 10 ае нәтиҗәләре буенча республиканың транспорт комплексы предприятиеләре 9,6 миллиард сум күләмендә табыш алган.

2010 елда транспорт комплексын финанслау күләме (Универсиада объектларын исәпләмичә) 22,49 миллиард сум тәшкил иткән, шуның 6,71 миллиарды - федераль бюджеттан, 15,78 миллиард сумы республика бюджетыннан.

2010 елда 307 миллион пассажирга транспорт хезмәте күрсәтелгән.

Ленар Сафин Казан һәм Чаллы арасындагы участокта М7 федераль автомобиль юлын реконструкцияләү эшләренең барышы хакында хәбәр итте. Министрның сүзләренә караганда, хәзерге вакытта 79 чакрым озынлыктагы юлны реконструкцияләү эшләре төгәлләнгән, автомагистральнең 25 чакрымында эшләр дәвам итә. 2011 елда төзекләндерү эшләре кысаларында Нократ елгасы аша салынган күпернең беренче чиратын файдалануга тапшыру күздә тотыла.

Министр сүзләренчә, автомагистральнең калган 130 чакрымын реконструкцияләүнең тулы бәясе 26 миллиард сум тәшкил итә. Шуңа бәйле рәвештә Ленар Сафин РФ Транспорт министрлыгына 2013 елга кадәр төзекләндерү эшләрен төгәлләр өчен финанс ягыннан тәэмин итү үтенече белән мөрәҗәгать итте. “Үзебезнең тарафтан без иң яхшы төзелеш компанияләрен җәлеп итәргә һәм эшне сыйфатлы итеп башкарырга вәгъдә бирәбез”, - дип ышандырды Л.Сафин.

Татарстан Республикасында Казан – Оренбург федераль автомобиль юлының яңа маршрутын үстерүдә Шәле – Баулы түләүле автомобиль юлын төзү проекты зур әһәмияткә ия. 2010 елда әлеге юлны төзүгә 2,6 миллиард сум акча үзләштерелде, юлның Шәле – Саескан тавы участогында хәрәкәт ачылды.

2011 елда “Казан” Халыкара аэропортын төзекләндерүгә 2,3 миллиард сум акча җәлеп итү күздә тотыла. Быелның октябрендә “А” терминалын төзү эшләрен төгәлләү ниятләнә.

Авыл торак пунктларын транспорт элемтәсе белән тәэмин итү Татарстан өчен бик әһәмиятле мәсьәлә. Ленар Сафин хәбәр иткәнчә, республикада каты өслекле автомобиль юллары белән элемтәсе булмаган 912 торак пункт бар. Башлангыч исәпләүләр буенча, әлеге авылларга керүче юлларны тиешле хәлгә китерү өчен 60 миллиард сумнан артык акча кирәк.

2010 елда 24 торак пунктны каты өслекле юл белән тоташтыру эшләре төгәлләнде.

Бистә юллары төзүне тизләтү өчен Татарстан җитәкчелеге Россия Транспорт министрлыгына яңа, гадиләштерелгән төзелеш стандарты эшләргә тәкъдим итә.

Россия Федерациясе транспорт министры урынбасары Олег Белозеров коллегиягә чакырганнары өчен Татарстан җитәкчелегенә рәхмәт белдерде. Министр урынбасары фикеренчә, республикада ирешелгән нәтиҗәләр шактый нык тәэсир калдыра.

Олег Белозеров транспортта иминлек мәсьәләләренә игътибар юнәлтте. Министр урынбасары Татарстандагы коллегаларына закон базасы һәм вәкаләтләрне чикләү җәһәтеннән өстәмә чаралар буенча тәкъдимнәрне җентекләп өйрәнү үтенече белән мөрәҗәгать итте. “Без сезнең тәкъдимнәрне көтәбез”, - дип мөрәҗәгать итте ТР җитәкчелегенә О.Белозеров.

Транспорт министры урынбасары фикеренчә, федераль, төбәк һәм муниципаль дәрәҗәләрдә юл фондлары булдыру юл хуҗалыгын финанслауны җитди арттырырга мөмкинлек бирәчәк.

Олег Белозеров Татарстандагы коллегаларына 2013 елда узачак Универсиада уңаеннан Казанның транспорт инфраструктурасын үстерү планын сыйфатлы итеп әзерләгәннәре өчен аерым рәхмәт белдерде. Министр урынбасарының сүзләренә караганда, әлеге план Татарстанга транспорт инфраструктурасын үстерү өчен федераль бюджеттан өстәмә акча алырга мөмкинлек бирәчәк.

Олег Белозеров шулай ук эшче төркемнең (аның составына ТР транспорт һәм юл хуҗалыгы министры Ленар Сафин да керде) кыска вакыт эчендә авыл юллары стандартын эшләячәгенә өмет белдерде.

Федераль юл агентлыгы җитәкчесе Анатолий Чабунин хәбәр иткәнчә, 2011 елда Татарстанда федераль акчалар хисабына 26 авыл торак пунктына илтүче юл төзеләчәк. А.Чабунин шулай ук авыл юллары стандартларын эшләү кирәклеген дә билгеләп үтте. “Кечкенә авылга IV категориядәге юл төзү максатка ярашлы түгел. Бүген авыл юлы стандартын аерым кертергә кирәк”, - диде Федераль юл агентлыгы җитәкчесе.

Дәүләт Думасының төзелеш һәм җир мөнәсәбәтләре комитеты рәисе Мартин Шаккум, үз чиратында, закон чыгаручылар исеменнән дәүләт сатып алулары турындагы 94 нче Федераль законны модернизацияләүне дәвам итәргә вәгъдә бирде.

Татарстан Президенты Рөстәм Миңнеханов үз чыгышында ышандырганча, республика алга таба да киң колачлы транспорт проектларын гамәлгә ашырачак. “Бүген без сезгә шактый күп “проблема” тудырабыз, - дип мөрәҗәгать итте Татарстан башлыгы Мәскәү коллегаларына. – Безнең идеяләрнең очы-кырые юк, без сезгә алга таба да тынгылык бирмәячәкбез”.

Республика башлыгы билгеләп үткәнчә, Татарстанның транспорт тармагы алдында зур бурычлар тора. “Мисал өчен, инде бүген үк без Универсиада барышында транспорт инфраструктурасының эшләвен минутлап язарга тиеш, - дип белдерде Р.Миңнеханов. – Теләсә кайсы зур чара, беренче чиратта, транспортка бәйле тәэсир калдыра һәм ул тискәре булмаска тиеш”.

Президент фикеренчә, иминлекне тәэмин итү эше беренче планга чыгарга тиеш.

Рөстәм Миңнеханов М7 һәм М5 магистральләрен алга таба реконструкцияләүнең мөһимлеген ассызыклады. ТР башлыгы фикеренчә, Кама һәм Казан сәнәгать узелларын заманча автомагистраль белән тоташтырырга кирәк.

Татарстан Президенты Олег Белозеровка РФ Транспорт министрлыгы Шәле – Баулы юлын төзүне үз контроленә алсын иде дигән үтенеч белән мөрәҗәгать итте. “Безнең эшкуар Фоат Комаров инде хәлдән тайса да, әлегә эшне дәвам итә, - дип хәбәр итте Р.Миңнеханов. - Әлеге юлны шәхси контрольгә алуыгызны үтенәбез. Төзүе бик катлаулы булса да, бу бик әһәмиятле магистраль”.

Федераль хакимият вәкилләренә мөрәҗәгать итеп, Рөстәм Миңнеханов 94 нче законга үзгәрешләр кертү эшен тизләтергә чакырды. “94 нче канун урынына яңа закон кирәкми – аны бик озак көтәргә туры киләчәк. Әмма үзгәрешләр кертү зарур. Берничә нигезләмә аркасында 94 нче закон үзенең нәтиҗәлелеген югалтты, аларны алыштырырга кирәк”, - дип саный республика башлыгы.

Президент юллар төзегәндә подряд оешмаларын сайлап алуга җитди якын килергә кушты. “Без бу эшләргә кем туры килсә шуны җәлеп итә алмыйбыз”, - дип белдерде Рөстәм Миңнеханов.

Р.Миңнехановның сүзләренә караганда, мультимодаль логистика үзәген төзү, “Казан” аэропортын реконструкцияләү план нигезендә бара.

Чыгышының ахырында Татарстан Президенты кадрлар әзерләү проблемасына игътибар юнәлтте. Рөстәм Миңнеханов фикеренчә, юл төзелеше белгечләрен Казан дәүләт архитектура-төзелеш университеты базасында да, чит илләрдә стажировка узу кысаларында да әзерләргә мөмкин.