Рөстәм Миңнеханов: "Патриотик тәрбия безгә лаеклы яшь буын бирә"

Бүген Татарстан Президенты Рөстәм Миңнеханов Түбән Камага эшлекле сәфәр кыла.

Республика башлыгының шәһәргә визиты хәрби-патриотик юнәлештәге бөтен комплексны үз эченә алган “Патриот” хәрби-патриотик үзәген ачу тантанасыннан башланды. Элеккеге мәктәпнең төзекләндерелгән бинасында хәрби комиссариат, РОСТО мәктәбе, спорт комплексы, ветераннар һәм Хәрби-диңгез флоты советлары, Десантчылар берлеге, шәһәр Сугышчан дан музее һәм эзтабарлар отрядлары урнашкан.

Үзәкне ачу тантанасында Президент бүгенге вакыйганың гаять зур әһәмиятен билгеләп үтте. “Мин нәкъ менә Түбән Камада мондый үзәкнең ачылуына бик тә шат. Без бу эшкә гаять зур көч һәм акча сарыф иттек. Һәм бу, һичшиксез, киләчәк буынны тәрбияләүдә уңай чагылыш табачак”, - дип ассызыклады Рөстәм Миңнеханов.

“Республиканың яшьләрне хәрби-патриотик рухта тәрбияләү һәм хәрби хезмәткә әзерләүдә билгеле бер нәтиҗәләре бар инде. Без ике ел рәттән бу юнәлештә Россиядә иң яхшылардан саналабыз. Мондый үзәкләр безгә алга таба да шушы югары планканы сакларга мөмкинлек бирер дип ышанам. Әмма безнең иң яхшылар рәтендә булуыбыз түгел, ә яшьләрнең дөрес принципларда тәрбияләнүе мөһим”, - дип саный Президент.

Түбән Кама мэры Айдар Метшин “хәрби-патриотик үзәк идеясен гамәлгә ашыруга ярдәм күрсәткәне өчен” ТР Президентына рәхмәт белдерде. Шәһәр башлыгы яшьләр арасында гражданлык җаваплылыгын һәм патриотизм хисен үстерү яшь буынны тәрбияләү эшен яңа эчтәлек белән баетырга мөмкинлек бирәчәгенә һәм армиянең абруен арттырырга ярдәм итәчәгенә ышаныч белдерде.

Татарстанның баш хәрби комиссары Сергей Погодин да түбәнкамалыларның уңышларын билгеләп үтте. “Мин республика Хөкүмәте һәм шәһәр җитәкчелегенә 23 февраль уңаеннан шундый бүләк ясаганнары өчен рәхмәт белдерәм. “Патриот” үзәге бөтен республика өчен хәрби-патриотик тәрбия бирүдә гаять зур ярдәм булыр дип ышанам”, - диде ул.

Рөстәм Миңнеханов үзәк җитәкчелегенә Алабугада җыелган микроавтобус, ә узган ел ике баланы суга батудан коткарган Түбән Кама кадеты Герман Захаровка ноутбук бүләк итте.

Кызыл тасманы кискәннән соң Татарстан Президенты өчен үзәк буйлап экскурсия үткәрделәр. Бүген Рөстәм Миңнеханов шулай ук Бөек Ватан сугышы ветераннары һәм бүгенге көндәге локаль конфликтларда катнашучылар белән аралашты.