Татарстанда Сергей Собянинга IT-проектлар тәкъдим иттеләр

Бүген Мәскәү мэры Сергей Собянинга IT-технологияләр өлкәсендә Татарстан эшләнмәләре тәкъдим ителде. Кунакны ТР Президенты Рөстәм Миңнеханов озатып йөрде.

Казан IT-паркында Сергей Собянинга “ТР Электрон Хөкүмәт”, “Электрон мәктәп”, шулай ук поликлиникаларда чиратларны киметүгә юнәлдерелгән “Электрон сәламәтлек саклау”, юл һәлакәтләрен киметүгә юнәлдерелгән “ГЛОНАСС һәм ЭЦП технологияләрен кулланып юл һәлакәтен теркәү инновация системасы” проектын тәкъдим иттеләр.

Шулай ук электрон документ әйләнеше бердәм ведомствоара системасы мөмкинлекләре, зыян күрүчеләрне коткару буенча “ГЛОНАСС+112” системасы тәкъдим ителде.

Казанның югары технологияләр өлкәсе IT-паркын аның директоры Динар Насыйров тәкъдим итте.

ТР Дәүләт заказы агентлыгы генераль директоры Яков Геллер федераль электрон сәүдә мәйданчыгы белән таныштырды. 2004 елда Татарстан электрон сатулар үткәрелгән беренче төбәк булды дип билгеләп үтте ул.

Хәзерге вакытта ресурстан торак фонды төзелешен һәм капиталь ремонт белән шөгыльләнүче дәүләт һәм муниципаль заказчылар, подрядчы оешмалар, автоном учреждениеләр, дәүләт һәм муниципаль килешүләрне башкаручылар, корпоратив заказчылар файдалана. Күрсәтелгән сатып алучылар “Бердәм килешүләр каталогы” ресурсында сатып алулар хакында мәгълүмат урнаштыра.

“Бюджет акчалары белән бәйле барлык килешүләр бу система ярдәмендә ачыкка әйләнде”, - дип билгеләп үтте Рөстәм Миңнеханов.

Мәскәү мэры “Документ әйләнеше системасы” компаниясе, ягъни ТР “Электрон Хөкүмәт” системасын эшләнгән офиста булды. Бу компания 2010 елның декабреннән алып Мәскәү мэриясендә дә шул системаны үстерү белән шөгыльләнә.

Бу өлкәдә эшләүчеләр сүзләренә караганда, Мәскәүдә электрон документ әйләнешенең киләчәк үсеше өчен системага рәсми затларның теркәлүе кирәк. Шуный белән бәйле рәвештә Сергей Собянинга шәхси кабинеты көйләнгән һәм эшкә әзерләнгән ноутбук бүләк ителде.

Мәскәү мэры Татарстан эшләнмәсен югары бәяләде.