Илдар Халиков: “Безнең өчен Татарстанда «PricewaterhouseCoopers» компаниясенең булуы мөһим”

«PricewaterhouseCoopers» компаниясенең консалтинг һәм аудиторлык хезмәтләре Татарстанның эре предприятиеләре өчен генә түгел, ә кече һәм урта бизнес өчен дә кызыклы һәм файдалы булырга мөмкин. Бүген ТР Премьер-министры Илдар Халиков «PwC» компаниясе вәкилләре белән очрашуда әнә шулай дип белдерде.
Республика Хөкүмәте йортында узган очрашуда шулай ук ТР икътисад министры Мидхәт Шаһиәхмәтов, “Универсиада-2013 дирекциясе” коммерцияле булмаган автоном оешмасы директоры Владимир Леонов, ТР Премьер-министрының тышкы икътисади эшчәнлек буенча ярдәмчесе Альфред Закиров, ТР Министрлар Кабинеты Аппаратының Икътисад, финанслар һәм дәүләт милкеннән файдалану идарәсе башлыгы Альберт Нәфыйгин катнашты.
Очрашуны ачып, Илдар Халиков «PricewaterhouseCoopers» компаниясенең Татарстанда күптәннән билгеле ышанычлы партнер булуын билгеләп үтте. “Компания клиентлары арасында республиканың иң эре предприятиеләре бар. Чит ил партнерлары катнашында киң колачлы проектлар гамәлгә ашырылган бүгенге икътисади үсеш шартларында да «PricewaterhouseCoopers» компаниясе белән хезмәттәшлек безнең өчен аеруча мөһим”, - дип ассызыклады ТР Премьер-министры.
Үз чиратында, «PwC» компаниясенең аудит бүлеге партнеры Дэвид Грей билгеләп үткәнчә, Казан һәм Татарстан компания өчен мөһим эш урыны булып тора. Республика башкаласында инде өч ел компаниянең даими офисы эшли, «PricewaterhouseCoopers» Татарстанның күпчелек эре предприятиеләре белән хезмәттәшлек итә. “Без Татарстан компанияләре белән хезмәттәшлекнең яңа юлларын эзләүне дәвам итәчәкбез”, - дип ассызыклады Дэвид Грей.
«PricewaterhouseCoopers» вәкилләре, компаниянең кече һәм урта бизнес вәкилләре белән эшләп, Татарстанда үз эшчәнлеген киңәйтергә теләве хакында хәбәр итте. «PwC» партнеры Мэйси Коффиның сүзләренә караганда, компания үсеш кичерүче бизнеска консалтинг һәм аудиторлык хезмәтләренең тулы бер спектрын тәкъдим итә алыр иде.
Татарстан Премьер-министры «PricewaterhouseCoopers» компаниясенең республикада эшләве зур әһәмияткә ия икәнлеген билгеләп үтте. Илдар Халиков ассызыклаганча, еш кына кече бизнеста талантлы менеджерлар белем һәм тәҗрибәләре җитәрлек булмаганлыктан, үзләрен тулысынча ача алмый. Шуның белән бергә, Татарстан Хөкүмәте башлыгы фикеренчә, консалтинг хезмәтләренә күпмедер күләмдә акча сарыф итүдән куркып, предприятиеләр алга таба шактый зур суммада акча югалтырга мөмкин.
ТР Премьер-министрының сүзләренә караганда, республикада даими рәвештә халыкара дәрәҗәдәге төрле икътисади форумнар уза. Шундый очрашу кысаларында «PricewaterhouseCoopers» компаниясе Татарстан эшкуарларын үз хезмәтләре белән таныштыра алыр иде. Илдар Халиков Татарстан Икътисад министрлыгы белән бу эшнең перспективалары хакында фикер алышырга тәкъдим итте.
ТР Хөкүмәте башлыгы шулай ук Татарстанда кече һәм урта эшкуарлыкны үстерү өчен зур инфраструктура – “Алабуга” махсус икътисади зонасы, технопарклар, индустриаль парклар төзелүе хакында искәртте. “Бу аудитор компаниясе эшчәнлеге өчен яхшы мәйдан дип уйлыйм”, - диде И.Халиков.
«PricewaterhouseCoopers» компаниясе вәкилләре шулай ук “Алабуга” махсус икътисади зонасының потенциалын чит ил инвесторларына презентацияләү өчен Татарстанга бәйсез эксперт сыйфатында үз хезмәтләрен тәкъдим итте.