Чуашстан Президенты “Майский” теплица комбинатын карады

Бүген Татарстан Республикасы Президенты Рөстәм Миңнеханов һәм Чуашстан Республикасы Президенты Михаил Игнатьев “Майский” Теплица комбинаты” ҖЧҖндә булды.

Хәзерге вакытта комплексның кышкы теплицаларының мәйданы 49 гектар тәшкил итә, алар 9 җитештерү цехына бүленгән. Кыяр, помидор, борыч, баклажан һәм башка төр яшелчәләр җитештерү 14,7 мең тоннадан (2000 ел) 24,5 мең тоннага (2010 ел) кадәр арткан.
Кыяр, помидор һәм башка төр культураларны ясалма яктылыкта үстерү яшелчәләрне ел дәвамында конвейерлап җитештерүне җайга салырга мөмкинлек биргән. Түтәлдән яңа өзеп алынган, экологик чиста продукция Мәскәү, Санкт-Петербург һәм Ерак Төньякка озатыла.

Комбинатның ике цехы 20 дән артык исемдәге (маринадланган кыярлар, кызыл һәм яшел помидор, борыч һәм башкалар) 6 миллионга якын консерв банкасы эшләп чыгара.

Рөстәм Миңнеханов һәм Михаил Игнатьев кыяр, помидор, җиләк һәм яшел тәмләткечләр үстерелә торган 6 һәм 10 нчы цехларда булып, комбинат теплицаларында үстерелүче экологик чиста продукцияне татып карады.

Кунаклар шулай ук төзелеш эшләре алып барыла торган 23 мегаваттлы энергия үзәге белән танышты. ТР Президенты әлеге объектта төзелеш эшләрен быел төгәлләргә күрсәтмә бирде.

Комбинат белән танышканнан соң комплекс директоры Илшат Ганиев журналистларга заманча энергия үзәген төзү эшләре узган ел башлануы хакында хәбәр итте. Ул 24 мегаватт электр энергиясе һәм 28 мегаватт җылылык энергиясе эшләп чыгарыр дип көтелә. Энергия ресурсларын үзендә җитештерү комплекска елына 115 миллион сумга якын акчаны янга калдырырга мөмкинлек бирәчәк. Энергия үзәген быелның октябрендә файдалануга тапшыру күздә тотыла.