Илдар Халиков 2011 елгы Гайдар форумы кысаларында түгәрәк өстәл үткәрә

Бүген Мәскәүдә “Россия һәм дөнья: инновацион стратегияне эзләгәндә” дигән Халыкара фәнни-гамәли конференция кысаларында Татарстан мисалында инновацион эшчәнлекне үстерү өчен төбәк инфраструктурасын булдырудагы актуаль мәсьәләләргә багышланган түгәрәк өстәл уза. Түгәрәк өстәлне ТР Премьер-министры Илдар Халиков алып барачак.
ТР Икътисад министрлыгының матбугат хезмәте хәбәр иткәнчә, түгәрәк өстәл кысаларында әлеге өлкәдә инновацион инфраструктура, закон чыгару һәм методологик инициативалар формалаштыруда дөнья һәм Россиянең алдынгы тәҗрибәсе хакында фикер алышу күздә тотыла. Анда катнашучылар махсус икътисади зоналар, технопарк структуралары, венчур фондлары, югары уку йортлары каршындагы кече инновацион предприятиеләр эшчәнлегенең нәтиҗәлелегенә бәйле мәсьәләләрне караячак, шулай ук перспективалы үзара хезмәттәшлек формаларын билгеләячәк.
Төбәк инновацион инфраструктурасының төп субъектлары эшчәнлеген оештыруда Татарстанның уңышлы тәҗрибәсен тәкъдим итү күздә тотыла. Алар арасында “Алабуга” махсус икътисади зонасы, территориясендә химия һәм полимер продукция эшкәртү өлкәсендә кече һәм урта компанияләрне урнаштыруга исәпләнгән “Химград” заманча индустриаль технополисы, “Идея” инновацион технопаркы, “Түбән Кама Нефтехим” ААҖ һәм башкалар бар.
Моннан тыш, түгәрәк өстәл кысаларында “Изварино Фарма” ҖЧҖ һәм “Идея” Инновацион-җитештерү технопаркы” ЯАҖ арасында “Химград” технополисы территориясендә Тикшеренүләр һәм эшкәртмәләр үзәген төзү” проектын гамәлгә ашыру буенча килешүгә кул кую күздә тотыла. Чарага экспертлар сыйфатында Россия Инновацияле төбәкләр ассоциациясе башкаручы директоры Иван Бортник, Ауропа реконструкция һәм үсеш банкының Россия буенча идарәче директоры Наталья Ханженкова, Россия венчур ярминкәсенең директор-координаторы Игорь Гладких һәм башкалар чакырылган.