Рөстәм Миңнеханов: “Татарстан белән Свердловск өлкәсенең үзара хезмәттәшлеге һәр ике төбәк өчен дә файдалы”

2011 елның 19 марты, шимбә
Татарстан – Россиянең иң динамик үсеш кичерә торган төбәкләренең берсе. Бүген Свердловск өлкәсе губернаторы Александр Мишарин ТР Президенты Рөстәм Миңнеханов белән Казан Кремлендә узган очрашуда әнә шулай дип белдерде.

ТР Президенты резиденциясендәге очрашуга кадәр Свердловск өлкәсе делегациясе 2013 елгы Универсиада авылында, IT-паркта, Югары медицина технологияләре белем бирү үзәгендә булырга өлгерде. “Татарстан – Россиянең иң динамик үсеш кичерә торган төбәкләренең берсе. Бүген без моңа үз күзләребез белән күреп инандык, - дип ассызыклады Александр Мишарин. – Төбәкнең куәте динамик рәвештә үсә. Безгә Татарстаннан өйрәнер әйберләр бар”.

Александр Мишарин 2010 елның сентябрендә Свердловск өлкәсе һәм Татарстан Республикасы арасында 2011-2014 елларга исәпләнгән сәүдә-икътисади, фәнни-техник, социаль һәм мәдәни өлкәләрдә хезмәттәшлек итү турындагы килешүгә кул куелуы хакында искәртеп узды. Бүген төбәк Хөкүмәтләре башлыклары – Анатолий Гредин һәм Илдар Халиков әлеге килешүне гамәлгә ашыру буенча чаралар планына кул куйды.

Аерым алганда, Александр Мишарин билгеләп үткәнчә, чаралар планы кысаларында 2 июльдә Свердловск өлкәсендә федераль Сабантуй узачак. Губернатор спорт, тынычлык һәм дуслык бәйрәменең иң югары дәрәҗәдә оештырылачагына ышандырды. Үз чиратында, Рөстәм Миңнеханов Татарстан делегациясенең Свердловск өлкәсенә федераль Сабантуйга, һичшиксез, киләчәген вәгъдә итте.

Александр Мишарин Татарстан һәм Свердловск өлкәсе икътисадларының структурасы охшаш булуын билгеләп үтте. Рөстәм Миңнехановның сүзләренә караганда, Свердловск өлкәсендәге партнерлар Татарстанга эре нефть химиясе производствосы өчен кирәкле җиһазлар китерә алыр иде.

“Барысы да элемтәләр ныгысын өчен булдырылган, - дип ассызыклады Александр Мишарин. - Әлеге хезмәттәшлек безнең төбәкләрдә яшәүче халыкның тормыш дәрәҗәсен күтәрүгә юнәлдереләчәк”.

Рөстәм Миңнеханов билгеләп үткәнчә, Татарстанга да коллегаларыннан әйрәнерлек әйберләр бар. Мисал өчен, балалар бакчаларына электрон чират проектын гамәлгә ашырганда Свердловск өлкәсе тәҗрибәсе кулланылды.

Татарстан башлыгы шулай ук “Свердловск өлкәсендә төрле милләт вәкилләре, шул исәптән татарларның, уңайлы тормышта яшәгәне, өлкә белән идарә итүдә югары позиция биләгәне өчен” кунакларга рәхмәт белдерде.

Рөстәм Миңнеханов ассызыклавынча, Екатеринбург – Казан – Мәскәү югары тизлекле тимер юл магистрале (аның бер участогы Татарстан территориясе аша узарга тиеш) комплекслы инвестиция төбәкара проектын гамәлгә ашыру алга ыргылыш булачак. “Үзебезнең тарафтан без проект уңышлы гамәлгә ашсын өчен бөтен көчебезне куячакбыз”, - дип ышандырды ТР Президенты.

Свердловск өлкәсе губернаторы проектка ярдәм күрсәткәне өчен Татарстан җитәкчелегенә рәхмәт белдерде. “Бу безнең өчен бик мөһим проект, - дип ассызыклады Александр Мишарин очрашу тәмамланганнан соң журналистларга биргән интервьюсында. – Урал шәһәрләре өчен бу яңа мөмкинлекләр, яңа чор, яңа тормыш сыйфаты”.

“Үзара хезмәттәшлек безнең төбәкләрдәге тормышның сыйфатын һәм дәрәҗәсен күтәрүгә юнәлдереләчәк”, - дип сүзен йомгаклады Александр Мишарин. “Безнең төбәкләрнең потенциалы гаять зур. Аны бергәләп гамәлгә ашырырга кирәк”, - дип ассызыклады үз чиратында Рөстәм Миңнеханов.
ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International