ТР Президенты җитәкчелегендәге Татарстан делегациясе Финляндиягә сәфәр кыла

Бүген Татарстан Республикасы Президенты Рөстәм Миңнеханов җитәкчелегендәге Татарстан делегациясенең Финляндия Республикасына сәфәре башланды. Финляндия башкаласы Хельсинкида ике көнлек визит программасына Финляндия Республикасы Президенты Тарья Халонен, Финляндиянең икътисади үсеш министры, Финляндия тышкы сәүдә министры белән очрашу, Татарстан делегациясенең “Экспомет” семинарында, шулай ук Татарстан белән Финляндиянең уртак эшче төркемнәре утырышында катнашуы каралган.

Бүген көннең икенче яртысында Татарстан Республикасы Президенты Рөстәм Миңнеханов Үзәк технология сәнәгате берлегендә Финляндия компанияләре һәм оешмалары җитәкчеләре белән очрашу үткәрүе ниятләнә.
Соңрак Финляндия татар җәмгыяте вәкилләре белән очрашу планлаштырылган. Финляндиягә сәфәрнең икенче көндә Татартсан делегациясе Лахти шәһәрендә “Энергон” тикшеренү үзәгендә булырга һәм “Pajakulma Oy” компаниясе эшчәнлеге белән танышырга ниятли.
Татарстан Республикасы делегациясе составына ТР сәнәгать һәм сәүдә министры Равил Зарипов, ТФ мәгариф һәм фән министры Альберт Гыйлметлдинов, ТР экология һәм табигый ресурслар министры Артем Сидоров, ТР икътисад министры Мидхәт Шаһиәхмәтов, Казан федераль университеты ректоры Илшат Гафуров, “Түбән Кама Нефтехим” ААҖ генераль директоры Владимир Бусыгин, ТР предприятиеләр һәм эшмәкәрләр ассоциациясе президенты Александр Лаврентьев һ.б. кергән.

Татарстан Республикасы Президенты Рөстәм Миңнехановның Финляндия Республикасына сәфәре кысаларында Россия Федерациясенең Финляндиядәге Гадәттән тыш һәм Тулы вәкаләтле вәкиле илчесе Александр Румянцев катнаша.